Альгерд Бахарэвіч будзе трымаць рэй падчас другога этапу MOVABOX
Літаратурны праект у рамках кампаніі Velcom падводзіць першыя вынікі і крочыць далей.
20 снежня ў кавярні «Утопія 60» урачыста завершыўся першы этап праекту MOVABOX, скіраванага на падтрымку беларускай мовы і літаратуры. Арганізатары і ўдзельнікі падзяліліся ўражаннямі ад першых васьмі тыдняў працы ініцыятывы ды абвесцілі пра перадачу літаратурнай эстафеты ад Людмілы Рублеўскай ды Альгерда Бахарэвіча.
Папяровая і электронная кніга – разам!
MOVABOX — гэта не «забойства» традыцыйнай папяровай кнігі, але спалучэнне анлайн-фармату з друкаваным выданнем. За мэту арганізатары абралі папулярызацыю сучаснай беларускай літаратуры ды набліжэнне яе да чытача. Кожны з чатырох этапаў праекту знаёміць публіку з адным папулярным айчынным аўтарам, адначасна прасоўваючы родную літаратуру як з’яву ў грамадстве.
Праект мае анлайн і афлайн часткі. Першую складае сайт праекту, дзе можна адказаць на пытанні, датычныя зместу кнігі ды выйграць цалкам матэрыяльны MOVABOX — скрыначку з самой кнігай ды артэфактамі, якія ў ёй згадваюцца. У выпадку з казкай-антыўтопіяй Бахарэвіча «Дзеці Аліндаркі», гэта ліхтарык, бальзам «Зорачка», шышка, кавалачак гліны і інш. Падзеі твора разгортваюцца ў лесе, таму і набор адпаведны. Афлайн частка ўяўляе сабой дваццаць пляцовак для беларускага буккросінгу ў кавярнях Менску ды іншых гарадоў краіны.
«На сваім сайце мы не пераказваем твор, — зазначыў кіраўнік аддзелу брэнд-мэнэджэмнту Velcom Зміцер Курловіч, — Мы нібыта «зацягваем» у кнігу. Лічбы наведванняў сведчаць, што ў нас пакуль атрмліваецца. Цягам першых васьмі тыдняў, сайт праекту наведалі 20 206 чалавек, тэст прайшлі 7 285, прынялі ўдзел у розыгрышы 4 270 ды атрымалі свой MOVABOX — 20 асобаў.»
«Не хапае не добрых твораў, а пасярэднікаў паміж аўтарам і чытачом»
Пісьменніца Людміла Рублеўская, чый твор «Авантуры студыёзуса Вырвіча» канцэнтраваў на сабе ўвагу на працягу першага этапу, адзначыла, што прыемна здзіўленая вынікамі праекту:
«Я атрымала вельмі шмат водгукаў менавіта праз MOVABOX. Людзі здзіўляліся, што ў беларускай літаратуры «такое ёсць». Гэта добра разбурае стэрэатыпы, згодна якім айчынная літаратура — гэта нешта пра вёску, вайну, пана альбо камсамол. Аказалася, усё па-іншаму!»
Альгерд Бахарэвіч падзякаваў арганізатарам за магчымасць удзелу ў праекце, ды нагадаў:
«Наша літаратура не горшая за іншыя еўрапейскія. Так, ёсць моўнае пытанне, якое стварае складанасці. Але па сваёй якасці беларуская літаратура іншым дакладна не саступае. У нас не хапае не добрых твораў, а пасярэднікаў паміж аўтарам і чытачом. У дадзеным выпадку MOVABOX наўпрост выдатна выконвае гэтую ролю!»
Варта адзначыць, што гэта далёка не першы праект кампаніі Velcom, скіраваны на падтрымку беларускай культуры. Раней ужо было чуваць пра адукацыйную ініцыятыву «Чытаем па-беларуску з Velcom», праект «Музей дзецям з Velcom», сумесна з Нацыянальным гістарычным музеем, цыкл «1000 музеяў Беларусі» і інш. Партнёрамі кампаніі ў праекце MOVABOX выступілі грамадска-культурная кампанія «Будзьма беларусамі!», партал электронных беларускіх кніг kniharnia.by ды моўныя курсы «Мова нанова».