Жонкі, сёстры і маці палітвязняў звярнуліся да беларусаў і еўрапейцаў: «Дапамажыце нашым родным выйсці на волю!» (відэа)

19 жанчын, родных і сваякоў палітычных вязняў, выступілі з супольным зваротам да беларускага народа і еўрапейскай супольнасці. Яны просяць не забываць і падтрымліваць тых, хто апынуўся ў Беларусі за кратамі за жаданне жыць у вольнай краіне.

Удзельніцы звароту засяроджваюць увагу на тым, што іх сваякі доўгія месяцы падвяргаюцца катаванням, сядзяць у турмах без рэальна здзейсненых крымінальных злачынстваў, а многім яшчэ толькі пагражаюць доўгія тэрміны, перадае «Радыё Свабода».

Жанчыны адзначылі, што ў Беларусі 502 палітвязні, аднак агульная лічба тых, хто апынуўся за кратамі за сваё жаданне жыць у вольнай і дэмакратычнай Беларусі, нашмат большая.

«Мы перакананыя, што ні адзін беларус не зрабіў нічога, што выходзіла б за межы неабходнай самаабароны альбо спынення больш цяжкага злачынства. Нашы блізкія павінны быць вызваленыя неадкладна», — гаворыцца ў звароце.