Знайшлі ў гаражы. Стала вядома прычына смерці 46-гадовага міністра транспарту

Чарговы высокапастаўлены лукашэнкаўскі чыноўнік памёр пры загадкавых абставінах. Як звычайна, дзяржаўная прапаганда не паведаміла пра прычыны заўчаснай смерці, але ў сучасным свеце падрабязнасці любых падзей часта становяцца вядомымі праз пэўны час.

Лукашэнкаўскі міністр транспарту і камунікацый Аляксей Аўраменка раптоўна памёр 4 ліпеня. Пра яго заўчасную смерць паведаміла дзяржаўнае агенцтва, але падрабязнасцей не прыводзіла. Незалежным крыніцам інфармацыі неўзабаве стала вядома прычына сыходу з жыцця чыноўніка.

Спачатку аб гэтым заявіла ініцыятыва былых сілавікоў «BYPOL» (тая яе частка, якой кіруе Аляксандр Азараў). Паводле яе крыніц, Аўраменка здзейсніў суіцыд.

Што менавіта стала апошняй кропляй і прычынай такога адчайнага кроку, яшчэ трэба высветліць, удакладніў «BYPOL».

Ініцыятыва нагадала, што менавіта пры гэтым міністры быў здзейснены акт паветранага пірацтва дзеля захопу Рамана Пратасевіча і Соф'і Сапега, выкарыстанне транспартнай інфраструктуры для забеспячэння расійскай агрэсіі супраць Украіны, а таксама масавыя чысткі і рэпрэсіі на беларускай чыгунцы і не толькі.

Пазней падрабязнасці смерці Аўраменкі агучыла «Наша Ніва». Спаслаўшыся на дзве крыніцы, выданне пацвердзіла, што чыноўнік скончыў жыццё самагубствам. Адбылося гэта ў гаражы на лецішчы, дзе яго знайшлі сваякі.

Сёння прайшла цырымонія развітання з Аўраменкам. На ёй прысутнічалі многія высокапастаўленыя чыноўнікі. Лукашэнка абмежаваўся вянком.

Крыніцы: Макей, імаверна, скончыў жыццё самагубствам

Аляксей Аўраменка нарадзіўся ў 1977 годзе ў Мінску.

У 1999 годзе скончыў Беларускую дзяржаўную політэхнічную акадэмію, у 2010 годзе — Акадэмію кіравання.

З 2000 па 2001 год працаваў галоўным спецыялістам аддзела ўтрымання дарожнай сеткі Камітэта па аўтамабільных дарогах пры Міністэрстве транспарту і камунікацый Беларусі, з 2001 па 2006 год — галоўным спецыялістам аналагічнага ўпраўлення ў дэпартаменце «Белаўтадар» ведамства.

З 2006 года працаваў на розных пасадах ва ўпраўленні транспарту і сувязі апарата Савета Міністраў Беларусі.

У 2012 годзе ўзначаліў упраўленне транспарту і сувязі апарата Савета Міністраў.

З 25 ліпеня 2013 года займаў пасаду намесніка міністра транспарту і камунікацый Беларусі, з 3 сакавіка 2016 года — пасаду першага намесніка міністра транспарту і камунікацый.

15 студзеня 2019 года Аляксей Аўраменка быў прызначаны міністрам транспарту і камунікацый.

За апошні год гэта трэцяя смерць беларускіх топ-чыноўнікаў: 26 лістапада 2022 года памёр міністр замежных спраў Уладзімір Макей, 2 красавіка гэтага года — намеснік міністра эканомікі Беларусі Сяргей Міцянскі.

Паводле звестак «НН», Макей у сваім доме ў Драздах таксама звёў рахункі з жыццём.