Вернікі прыносяць знічкі да сценаў зачыненага Чырвонага касцёла
Традыцыйную актаву малітвы за памерлых сёлета праводзяць ля сцен закрытага Чырвонага касцёла, а не ў самім храме. Вернікі нясуць знічы да труны фундатара касцёла Слугі Божага Эдварда Вайніловіча, якая знаходзіцца пры храме.
У мінулыя гады ля ўваходу ў Чырвоны касцёл размяшчалі сімвалічны алтар, вакол якога знаходзіліся сотні лампадак, якія ставілі вернікі ў знак малітвы за сваіх родных, што адыйшлі ў вечнасць, піша Katolik.life.
Што тычыцца сітуацыі з закрыццем касцёла, то парафія паведаміла, што да гэтага часу на ўсе звароты да дзяржаўных уладаў не атрымала канкрэтных адказаў. Таму ў парафіі заклікаюць і надалей трываць у ружанцовай малітве вакол касцёла і дома ў сем'ях — у інтэнцыі хутчэйшага адкрыцця храма для вернікаў і аднаўлення правядзення набажэнстваў.
Новых каментароў уладаў аб сітуацыі таксама пакуль няма.
