Усіх журналістаў «Нашай Нівы» выклікаюць на допыт у Следчы камітэт

Пра гэта паведаміў галоўны рэдактар Ягор Марціновіч.

«Следчы камітэт» запускае свой канвеер. На наступны тыдзень выклікаюць на допыты ўсіх 20 супрацоўнікаў «Нашай Нівы», — напісаў Марціновіч.

У каментарах ён патлумачыў, што яго калег хочуць дапытаць у якасці сведак па крымінальнай справе, якая была ўзбуджана ў верасні. Пацярпелым па справе праходзіць тагачасны намеснік міністра МУС Аляксандр Барсукоў, падазраваны — галоўрэд «НН».

На пачатку восені ў інтэрв'ю «Нашай Ніве» «ды-джэй перамен» Уладзімір Сакалоўскі распавёў, што яго збіў у ізалятары менавіта Барсукоў. Справа заведзена па артыкуле 188 КК РБ («Паклёп»). У сувязі з гэтым у верасні Марціновіч правёў тры дні пад вартай.