Суд адмовіўся разглядаць скаргу на нерэгістрацыю кандыдаткі
Суд адмовіўся разглядаць скаргу Алены Янушкоўскай, кандыдаткі ад БХД, на нерэгістрацыю.
Фото vicebskreg.by
Суд Віцебскага раёна адмовіў кандыдату ад Беларускай хрысціянскай дэмакратыі Алене Янушкоўскай у разглядзе скаргі на нерэгістрацыю яе кандыдатам па Заронаўскай сельскай акрузе Віцебскай раённая выбарчай камісіі.
Суд адмовіў на падставе таго, што Віцебскі абласны выбаркам зацягнуў разгляд аналагічнай скаргі і толькі ў вечары апошняга магчымага для падачы скаргі ў суд дня паведаміў, што разглядаць яе не будзе. Такім чынам час падачы і быў пратэрмінаваны. Зараз застаецца толькі падаць скаргу ў суд на дзеянні абласной камісіі.
Віцебская выбарчая машына, якая ўключае ў сябе і такія структуры, як суды і пракуратуры, мае добра наладжаны механізм замаруджвання разгляду спраў, апраўдання любога беззаконня дзеянняў камісій рознага ўзроўню, аб чым сведчыць багатая гісторыя ўдзелу ў выбарах прамоўцаў БХД: Таццяны Севярынец, Алены Шабуні, Святланы Валажонак, Паўла Севярынца ды іншых. Зараз гісторыя "ўзбагачаецца" новымі імёнамі.
“Выбары ў Беларусі — гэта дрэнны спектакль. І ўдзельнічаем мы, каб выбаршчыкі, нарэшце, скінулі свае ружовыя акуляры ды зразумелі, што адседжвацца па ўласных канапах — апошняя справа, баяцца і маўчаць — здрадніцтва ў дачыненні да ўласных дзяцей і ўнукаў. І пакуль не падымемся з уласных канапаў, не спаганім з гэтай улады за ўсе гады стратаў і расчараванняў, нічога не зменіцца”, — адзначыла каардынатар БХД па Віцебшчыне Таццяна Севярынец.