Шабнам Худайдодаву выпусцілі з СІЗА
Як стала вядома праваабаронцам з "Вясны", сёння актывістку з Таджыкістана Шабнам Худайдодаву выпусцілі з СІЗА Брэста.
Шабнам Худайдодава. Фота з сайта spring96.org
Нагадаем, актывістка апазіцыйнай таджыкскай арганізацыі “Група 24” Шабнам Худайдодава была арыштаваная 15 чэрвеня 2015 года пры пераходзе беларускай мяжы.
З дня арышту актывістка ўтрымлівалася ў следчым ізалятары горада Брэста. Яе затрымалі па запыце Таджыкістана, паколькі яна абвінавачваецца па артыкуле 37 Крымінальнага кодэкса Таджыкістана — «Адказнасць саўдзельнікаў злачынства». Агулам у беларускім СІЗА яна правяла 252 дні.
Шабнам Худайдодава была абвешчаная ў вышук пасля высылкі з Расіі Максуд Ібрагімава, лідэра і заснавальніка арганізацыі «Моладзь Таджыкістана за адраджэнне Таджыкістана», члена кіраўніцтва кааліцыі апазіцыйных сіл «Новы Таджыкістан», у якую ўваходзіць і «Група 24». 20 студзеня ён знік у Маскве. Пра яго становішча да гэтага часу мала вядома.
У студзені 2015 у доме Шабнам Худайдодавай быў праведзены ператрус, дапытвалі яе маці і ўсіх, з кім яна падтрымлівала адносіны ў Таджыкістане.
Апошнія гады Шабнам Худайдодава жыла ў Расіі. У сацыяльных сетках яна актыўна падтрымлівала крытычныя меркаванні палітычнай апазіцыі Таджыкістана, падкрэслівала неабходнасць дэмакратычных рэформаў у сваёй краіне.