Праваабаронцы прызналі палітвязнямі яшчэ 11 чалавек

Праваабарончыя арганізацыі Беларусі адзначаюць, што ўсім гэтым асобам прад'яўлены абвінавачванні, ці яны змешчаныя пад варту, ці ім вынесеныя прысуды па адным артыкуле Крымінальнага кодэкса.

Па ч. 1 артыкула 342 Крымінальнага кодэкса («Групавыя дзеянні, якія груба парушаюць грамадскі парадак») прад'яўлены абвінавачванні, змешчаныя пад варту, вынесеныя прысуды ў дачыненні да Аксаны Аляксеевай, Андрэя Асмалоўскага, Дзмітрыя Брэля, Кацярыны Глінскай, Мікалая Казлова, Антаніны Кавалёвай, Антона Маслыкі, Артура Смалякова, Галіны Тарноўскай, Юрыя Чарапнёва.

Накіраваны для адбыцця пакарння ў выглядзе абмежавання волі па ч.1 арт.342 КК у папраўчую ўстанову Аляксандр Копаць.

Праваабаронцы ў чарговы раз адзначаюць, што свабода мірных сходаў гарантаваная артыкулам 21 Міжнароднага Пакта аб грамадзянскіх і палітычных правах.

Выступы грамадзянаў насілі стыхійны, самаарганізаваны характар і былі выкліканыя недаверам да вынікаў выбараў Прэзідэнта Рэспублікі Беларусь, якія адбыліся 9 жніўня 2020 года і праходзілі са шматлікімі парушэннямі і фальсіфікацыямі, не былі прызнаныя міжнароднай супольнасцю як дэмакратычныя, справядлівыя і свабодныя.

Сходы грамадзянаў насілі мірны характар і не ўяўлялі пагрозы ні нацыянальнай, ні грамадскай бяспецы. Нягледзячы на гэта, дэманстранты былі атакаваныя спецпадраздзяленнямі МУС з непрапарцыйным прымяненнем фізычнай сілы, спецсродкаў і зброі.

«Мы ацэньваем пераслед вышэй названых асоб, якія былі пазбаўленыя волі і абвінавачаныя ў групавых дзеяннях, якія груба парушаюць грамадскі парадак, і масавых беспарадках, як палітычна матываваны пераслед у сувязі з рэалізацыяй імі свабоды мірных сходаў і выказвання свайго меркавання і прызнаем іх палітычнымі зняволенымі», -- гаворыцца ў заяве.

Праваабаронцы ў чарговы раз патрабуюць неадкладна вызваліць усіх палітычных зняволеных, а таксама грамадзян, затрыманых у сувязі з рэалізацыяй свабоды мірных сходаў у поствыбарчы перыяд, перагледзець палітычна матываваныя справы і спыніць палітычныя рэпрэсіі ў дачыненні да грамадзян краіны.

Цяпер спіс палітычных зняволеных у «вясноўцаў» налічвае 1262 чалавекі. Ініцыятыва dissident.by вызнае палітзняволенымі 1550 чалавек.