Парад дзіцячых вазкоў у Пінску (фота)

Упершыню ў Пінску адбыўся парад дзіцячых вазкоў. Каля сарака сем’яў арганізаваным шэсцем прайшлі па гістарычнаму цэнтру сталіцы Палесся.



Акцыя адбылася ў межах святкавання Дня моладзі. Удзельнікі змагаліся за перамогу ў пяці намінацыях, якія падзяляліся на адлюстраванне нацыянальных традыцый, прафесій, гісторыі, касмічных выяваў ды анімацыю.

Чалец журы Мілана Баль прызналася, што не чакала такой фантазіі ад пінчан:

— Я вельмі здзіўлена тым, колькі ў нашых людзей фантазіі. Мне насамрэч было вельмі цяжка выбраць пераможца. Людзі прыклалі столькі намаганняў, каб упрыгожыць дзіцячыя вазкі. Бачна, што ўсе: і тата, і мама, і родныя — прыклалі руку да гэтага. Шмат дзіцячых вазкоў мне спадабалася.

Арганізатары параду дзіцячых калысак у Пінску паабяцалі, што паспрабуюць зрабіць мерапрыемства штогадовым. Дагэтуль аналагічныя мерапрыемствы ладзіліся ў Брэсце ды Мінску.

Пятро Савіч, Беларускае Радыё Рацыя, Пінск

Фота Констанцін Маславец, varjag.net