Палітвязня Вадзіма Нікалаева адправілі ў калонію за чатыры каментары

Палітвязню, якога ўтрымліваюць пад вартай ужо 7 месяцаў, прысудзілі два гады пазбаўлення волі за некалькі каментароў у інтэрнэце, паведамляюць праваабаронцы.

22 сакавіка Брэсцкі абласны суд вынес рашэнне па справе палітвязня Вадзіма Нікалаева, якога абвінавачвалі ў здзяйсненні злачынства па ч. 1. арт. 130 («Распальванне расавай, нацыянальнай, рэлігійнай альбо іншай сацыяльнай варожасці або варажнечы»).

Вадзіма абвінавачвалі ў тым, што ў інтэрнэце ён заклікаў да гвалту над міліцыянтамі, супрацоўнікамі пракуратуры і суддзямі — у тэлеграм-чаце «П@нск 97%» размясціў чатыры паведамленні, якія і сталі прадметам судовага разбіральніцтва. Пра якія менавіта паведамленні ідзе гаворка, не паведамляецца.

«У размове ён таксама дзяліўся з удзельнікамі тэлеграм-чата парадамі аб тым, як заставацца ананімнымі ў інтэрнэце», — паведамілі пасля затрымання ў МУС.