Новая хваля рабочых пратэстаў?
На 1 рудаўпраўленні ААТ «Беларуськалій» 12 красавіка адбыўя стыхійны сход. Работнікі УСП Траста «Рэммантажбуд» адмовіліся выконваць сваю працу, бо не задаволены зніжэннем узроўня яе аплаты.
— Учора атрымалі разліковыя лісткі, сёння падыходзяць людзі з пытаннем: што рабіць?, — распавядае старшыня НПГ УСП Траста «Рэммантажбуд» Сяргей Баброў, які прымаў удзел у стыхійным сходзе. — Заробак упаў у два разы, я ў сакавіку 2016 года зарабляў 1400 рублёў, сёння 710. Людзі сёння пачалі абурацца, кажуць, як жыць далей? Атрымалі па 280 рублёў, а трэба крэдыты выплачваць, за што жыць? Такога ніколі не было!
Рабочыя арганізавана пайшлі да лінейнага кіраўніцтва, каб тыя выклікалі кіраўніцтва трэсту. Прыбыўшы дырэктар трэста Курбыка В.М. яшчэ больш раззлаваў работнікаў, заявіўшы, што няма такога падзення зарплаты, пра якое кажуць людзі:
— З'явілася адчуванне, што адміністрацыя «плавае» ў маніторынгу заробкаў, альбо папросту хавае дадзеныя, — кажа Сяргей. — Кіраўнік пачаў пагражаць, заяўляючы, што на нашы месцы прыйдуць іншыя падрадчыкі і ўсё застануцца без працы і ён, у тым ліку.
На думку работнікаў, замест таго, каб паспрабаваць вырашыць праблему, ён толькі яе пагоршыў. Дзве гадзіны гутарак, а ў выніку ні да чаго не прыйшлі. У сваю чаргу дзяржаўны прафсаюз, як заўсёды, адмаўчаўся.
На думку Сяргея Баброва, было відаць, што работнікі засталіся задаволеныя сабой, не рэагавалі на падвышаны тон дырэктара:
— Я рэальна адчуваю падтрымку нашых работнікаў, нягледзячы на тое, што не арганізоўваў нічога, усё атрымалася спантанна. І гэта вельмі добра, што людзі самаарганізаваліся, у гэтым я бачу толькі станоўчае. Прычына ў відавочным недаглядзе кіраўніцтва, бо праблема паўстала не сёння, падзенне заробкаў пачалося са студзеня. Мы хацелі агучыць гэтыя праблемы на сходзе ўчастка РМУ ў сакавіку, але з кіраўніцтва трэсту, акрамя начальніка ўчастка, ніхто не прыйшоў. Убачыўшы такое стаўленне, народ устаў і проста сышоў.
Са слоў Сяргея, работнікам 1 РУ тэлефанавалі работнікі з іншых пляцовак, з 2, 3 і 4 рудаўпраўленні, якія заявілі калегам і свайму кіраўніцтву, што яны таксама падтрымліваюць патрабаванні.
Кіраўніцтва прапанавала сабрацца наступным днём, выбраўшы асноўных прадстаўнікоў ад працоўнага калектыву.
Адразу ж пасля гэтага выпадку работнікі адчулі найстражэйшы кантроль за распарадкам працоўнага часу. Натуральна будуць падлоўліваюць і сачыць, лічыць прафактывіст. У адрас Незалежнага прафсаюза гарнякоў пачаліся абвінавачванні ў падрыхтоўцы гэтай акцыі.
Паводле belnp.org