КДБ Беларусі: Падпал будынку ДАІ ў Мазыры — акт тэрарызму
Падпал будынку ДАІ ў Мазыры кваліфікаваны як акт тэрарызму, паведаміў у эфіры Беларусь 1 начальнік аддзелу следчага упраўлення КДБ Беларусі Канстанцін Бычак.
![Фота СК Фота СК](/img/v1/images/gai_mozyr_podzhog.jpg?f=f&h=396&o=0&u=1715395350&w=528)
Фота СК
«Уначы 28 кастрычніка ў Мазыры ўчынены падпал будынку аддзелу ДАІ Мазырскага РАУС. Гэтыя дзеянні кваліфікаваныя паводле часткі 1 артыкула 289 Крымінальнага кодэксу — акт тэрарызму. Матэрыялы крымінальнай справы перададзеныя для далейшага расследавання ва упраўленне Камітэту дзяржаўнай бяспекі па Гомельскай вобласці. КДБ сумесна з іншымі праваахоўнымі органамі ажыццяўляе пошук датычных», — сказаў Бычак, якога цытуе ў сераду дзяржаўнае інфармагенцтва БелТА.
Надзвычайнае здарэнне адбылося мінулай ноччу. Па версіі следства, невядомы падышоў з тыльнага боку да адміністрацыйнага будынка ДАІ Мазырскага РАУС, разбіў шкло акна на першым паверсе і кінуў унутр памяшкання бутэльку з запальваючай вадкасцю. Згарэў кабінет.
Зараз следчыя вывучаюць запісы з камер відэаназірання і ўстанаўліваюць датычных да здарэння.