Яшчэ трох чалавек прызналі палітвязнямі ў Беларусі

Беларускія праваабаронцы прызналі палітвязнямі яшчэ трох чалавек — Юрыя Дрэка, Аляксандра Бажкова і Віктара Каліноўскага.

Усе яны былі асуджаныя на абмежаванне волі або арышт па артыкуле аб хуліганстве за надпісы пратэснага характару на будынках, паведамляе REFORM.by са спасылкай на праваабаронцаў.

Праваабаронцы адзначаюць, што нанясенне надпісаў такога кшталту не з'яўляецца праявай хуліганства і вандалізму, яны не ўтрымліваюць мовы варожасці і нянавісці, а матэрыяльная шкода ад надпісаў мае сімвалічны характар.

«Змест надпісаў у кантэксце грамадска-палітычных падзей і публічных грамадскіх дыскусій, палітычных пратэстаў, якія праходзяць у краіне з лета 2020 года, сведчыць аб тым, што матывам іх нанясення было выказванне меркавання на грамадска значныя тэмы», — гаворыцца ў заяве праваабаронцаў.

Агульная колькасць людзей, афіцыйна прызнаных палітвязнямі, дасягнула 589 чалавек.