Дыктоўка: аншлаг у два заходы

Беларуская дыктоўка ў Мінску прайшла з аншлагам. У Літаратурным музеі Максіма Багдановіча давялося тэрмінова дадрукоўваць бланкі лістоў. А саму дыктоўку з нагоды Міжнароднага дня роднай мовы праводзіць у два этапы.   “Сёння так, ажыятаж. Мы, вядома, не чакалі, — сказала Алена Анісім, намесніца старшыні Таварыства беларускай мовы. А кіраўнік ТБМ Алег Трусаў зазначыў, што хутка дыктоўкі прыйдзецца ладзіць у Палацы Рэспублікі. “На “Мінск-арэне, — прапанаваў адзін з прысутных.



Беларуская дыктоўка ў Мінску прайшла з аншлагам. У Літаратурным музеі Максіма Багдановіча давялося тэрмінова дадрукоўваць бланкі лістоў. А саму дыктоўку з нагоды Міжнароднага дня роднай мовы праводзіць у два этапы.

“Сёння так, ажыятаж. Мы, вядома, не чакалі, — сказала Алена Анісім, намесніца старшыні Таварыства беларускай мовы. А кіраўнік ТБМ Алег Трусаў зазначыў, што хутка дыктоўкі прыйдзецца ладзіць у Палацы Рэспублікі. “На “Мінск-арэне, — прапанаваў адзін з прысутных.

Арганізатары адзначылі сімвалічнасць сёлетняга мерапрыемства. Вуліца Максіма Багдановіча, на якой знаходзіцца аднайменны музей, творы паэта для дыктоўкі і юбілейны год Максіма Багдановіча.

У залі музея 21 лютага дыктоўку правялі для дзвюх групаў. Як паведаміў Алег Трусаў, у ёй ўзялі ўдзел каля 150 чалавек.

На яго думку, людзі ў няпростай моўнай сітуацыі хочуць сябе праявіць. “То-бок гэта праява патрыятызму. Чалавек прыйшоў пісаць дыктоўку ў Дзень роднай мовы. Ён паказвае, што ён беларус. Што ён за незалежнасць, як і Багдановіч. І тэксты мы падабралі адпаведныя.

Для IV Усеагульнай дыктоўкі, нагадаем, былі прапанаваны на выбар верш Максіма Багдановіча “Я хацеў бы спаткацца з Вамі на вуліцы… і яго празаічны тэкст “Хто мы такія?. “Гэты тэкст актуальны сёння, як і верш, — падкрэсліў кіраўнік ТБМ. Удзельнікам дыктоўкі, якія прыйшлі ў музей, быў зачытаны для напісання паэтычны твор. Яго дыктавала Алена Анісім.

Яна зазначыла святочны настрой і прыўзнятасць у наведнікаў. “Людзі віншуюць адзін аднаго са святам. Людзі адчуваюць еднасць. І яднае іх мова. І гэта вельмі радуе. І хочацца, каб гэты настрой яднання на грунце роднай мовы запанаваў у грамадстве поўнасцю, — зазначыла яна.

Арганізатары звярнулі ўвагу на асвятленне мерапрыемства ў СМІ. Пра яго распавядалі не толькі неафіцыйныя выданні, але і дзяржаўныя, у тым ліку беларускае тэлебачанне.

“Канечне, людзей кожны год большае, — рэзюмавала Алена Анісім. — І гэты год не стаў выключэннем. І асабліва ўсцешна, што далучаецца моладзь. І не толькі тыя, хто ведае, што такое ТБМ і з’яўляецца сябрам ТБМ. А і многа новых людзей. Шанаванне роднай мовы і жаданне штосьці зрабіць на яе карысць, дзеля яе папулярызацыі, дзеля яе пашырэння ўжывання ў грамадстве — гэта вельмі і вельмі важна. І менавіта гэтае жаданне прысутнічала ў людзей.

На дыктоўку прыйшоў і сакратар пасольства Расійскай Федэрацыі. “І ён пісаў дыктоўку. І даволі добра напісаў, — паведаміла Алена Анісім.

Дыктоўкі, прымеркаваныя да Міжнароднага дня роднай мовы, прайшлі і ў іншых гарадах Беларусі. У Мінску ўсе ахвотныя могуць прыняць у іх удзел і надалей. Таварыства беларускай мовы правядзе яшчэ тры дыктоўкі па творах Багдановіча. Яны ладзяцца ў сядзібе ТБМ (вул. Румянцава, 13) — 23 лютага, а таксама 15 і 25 сакавіка. Пачатак а 18-й гадзіне.