«Бажынкі-2014»: «Медыямарафон», «Аngry JAB», яйкі, катамараны і Валерый Шчукін
8–9 жніўня па Гомелі і яго ваколіцах пракаціўся карпаратыўны фестываль ГА “Беларуская асацыяцыя журналістаў”.
На сёлетні фэст запісалася каля трох дзесяткаў адважных і нястомных БАЖаўцаў з Мінска, Брэста, Маладзечна, Горак, Барысава, Глыбокага і Баранавічаў, якія палічылі, што адлегласці не павінныя перашкаджаць жуналісцкаму яднанню. Прычым, адвагу і нястомнасць прадэманстравалі не толькі лёгкія на пад’ём маладзёны, але і заслужаныя БАЖаўцы сталага веку – Валерый Аляксеевіч Шчукін, напрыклад, запісаўся на фэст адным з першых (на фота ніжэй).
Першы з двух надзвычай насычаных дзён распачаўся “Медыямарафонам” па Гомелі: на працягу чатырох гадзін пяць журналісцкіх каманд гойсалі па горадзе, рыхтуючы матэрыялы на зададзеную “штабам” тэму.
Пяць падрыхтаваных імі матэрыялаў арганізатары ўвечары накіравалі на суд прадстаўнічага журы ў складзе Людмілы Атчанашанка, Аляксандра Тамковіча, Аляксандра Коктыша, Сяргея Балая і Змітра Лукашука, якое ацаніла творчасць калег па 5-бальнай сістэме і вызначыла пераможцаў. (Вынікі “Медыямарафона” падводзіліся ў суботу.)
Удзельнікі атрымліваюць "рэдакцыйныя заданні", мапы горада і талоны на праезд
Сёлета сімвалам "БАЖынак" быў "Angry JAB" – сярдзітая брывастая жабка, чый вобраз быў навеяны знакамітай камп'ютарнай гульнёй "Angry Birds"
Добра папрацаваўшы, “марафонцы” перайшлі да якаснага адпачынку на беразе Сожа.
У Год гасціннасці Angry Jabs "сардэчна запрашЧаюць" удзельнікаў "Медыямарафона" на месца адпачынку
Лагодныя рачныя хвалі, маляўнічы краявід, гомельскія прысмакі і феерычныя выступы гурта «Ягорава Гара» і Вольгі Цярэшчанка ў месяцовым святле дапамаглі стрэсці дзённую стому і адкрылі «другое дыханне», так што спаць клаліся позна...
Другі дзень быў не менш насычаны: адразу ж пасля сняданку пачаліся спартовыя і... каляспартовыя мерапрыемствы.
Кіданне сырых яек у калег вельмі натхніла ўдзельнікаў фэсту. Тых, хто іх лавіў, не адпускала нервовае напружанне...
Гонкі на катамаранах у гарачыню – вельмі дарэчы
Пасля вясёлых спаборніцтваў каманды пачалі рыхтавацца да прэзентацыі. Кожная мусіла прыдумаць сабе назву, сімвал і дэвіз, а таксама распавесці калегам, як ім разам працавалася ў палявых умовах днём раней.
Прэзентацыю каманды "Цмокі" пад кіраўніцтвам Глеба Лабадзенкі старшыня ГА "БАЖ" Жанна Літвіна вызначыла як найлепшую!
Пасля прэзентацыі надышоў час узнагародаў. Паводле журы, самы ўдалы матрыял атрымаўся ў каманды Таццяны Смоткінай, Настассі Роўда, Руслана Гарбачова і Барыса Гарэцкага, якія даследавалі асартымент прадуктаў на гомельскіх рынках (куратарам ад Гомеля выступаў Мікалай Гарбачоў).
На другім месцы апынулася каманда Ларысы Шчыраковай, Алега Агеева, Антона Сурапіна і Ігара Дароніна (куратарам ад Гомеля выступаў Леанід Судаленка). Яна шукала ў Гомелі мясцовую цікавостку – шакаладныя пяльмені.
Трэцяе месца заняла каманда Галіны Буднай, Аляксандра Зянкова, Валянціна Міхальцова і Генадзя Кеснера (куратарам ад Гомеля выступаў Яўген Якавенка). Каманда, праўда, змяніла зададзеную тэму – замест гомельскіх скейтбардыстаў, якіх з-за гарачыні ў горадзе не знайшлося, журналісты распыталі пра жыццё бабульку, якая зарабляе вулічным граннем на гітары... лямпачкай. (Тэксты-пераможцы будуць даступныя ў інтэрнэце пазней.)
Акрамя гэтага, па традыцыі шляхам апытання ўдзельнікаў былі вызначаныя "Містэр БАЖынкі" і "Міс БАЖынкі" – Анатоль Гатоўчыц і Ларыса Шчыракова, а таксама "Віцэ-містэр", і "Віцэ-міс" – Яўген Валошын і Настасся Роўда. Як заўжды, хлопцы выбіралі "Міс", а дзяўчаты – "Містэраў".
"Містэр БАЖынкі" Антоль Гатоўчыц (злева). Кабеты заўсёды цанілі мужчын, якія добра кушаюць...
Ларыса Шчыракова
Яўген Валошын
Настасся Роўда
Як зазначыў на развітанне кіраўнік Гомельскай філіі ГА “БАЖ” Анатоль Гатоўчыц, варта часцей праводзіць “БАЖныя” мерапрыемствы ў рэгіёнах. “Вось у наступным годзе – зноў Гомель, а пасля ўжо можна і іншыя месцы апрабаваць”, – бадзёра рэзюмаваў гасцінны гаспадар.
