Мацюшэўскі болей не кіруе БелВЭБам. Нядаўна яго затрымлівалі

Супрацоўнікі банка БелВЭБ атрымалі сёння пранікнёны ліст ад былога старшыні праўлення Васіля Мацюшэўскага. Ëн сыходзіць з банка. Гэтаму папярэднічаў канфлікт с кіраўніком Нацыянальнага банка Калаўрам, арышт топ-менеджараў і астранамічны выкуп за свабоду.

«Дарагія сябры, калегі! Заканчваючы работу ў банку БелВЭБ, шчыра ўдзячны ўсім работнікам нашага дружнага калектыву за сумесную дзейнасць. Вы — важная частка майго жыцця. Разам мы ўжо рэалізоўвалі смелыя рашэнні і складаныя праекты, якія рабілі наш банк інавацыйным і паспяховым.

Мне было прыемна працаваць з нашай камандай: прафесіяналізм, ініцыятыўнасць, высокая адказнасць кожнага з нас дазволілі дасягнуць вынікаў, якімі варта ганарыцца.

Дзякуй за цёплую атмасферу ў нашым калектыве, паразуменне і павагу.

Шчыра зычу банку БелВЭБ паспяховага развіцця і росквіту, а кожнаму з вас — шчасця і ўдачы», — напісаў Мацюшэўскі, паводле інфармацыі найстарэйшага беларускага выдання , прызнанага «экстрэмісцкім».

Крымінальная справа супраць яго не закрытая. Разам з Васілём Мацюшэўскім сыходзіць і праўленне банка.

Банкір і былы віцэ-прэм'ер і сем іншых прадстаўнікоў кіраўніцтва банка БелВЭБа былі затрыманыя сілавымі органамі менш за месяц таму. Неўзабаве Мацюшэўскага і яшчэ некалькіх яго намеснікаў адпусцілі. Паводле адной з версій, Мацюшэўскага тады адпусцілі для таго, каб ён змог «аператыўна знайсці сродкі для кампенсацыі шкоды».