«Будзем патрабаваць тлумачэнняў». Ва ўкраінскай партыі адрэагавалі на сустрэчу яе дэпутата з Лукашэнкам

Сустрэча дэпутата «Слугі народа» з Аляксандрам Лукашэнкам — яго асабістая ініцыятыва, ён не прадстаўляе Украіну. Фракцыя запатрабуе ад яго тлумачэнняў, паведаміў LIGA.net намеснік кіраўніка фракцыі Аляксандр Карніенка.

Ён сказаў, што Шаўчэнка не быў дэлегаваны партыяй «Слуга народа», МЗС або офісам прэзідэнта на правядзенне якіх-небудзь перамоў з афіцыйнымі асобамі Беларусі. Шаўчэнка таксама не ўваходзіць у склад парламенцкай дэлегацыі ў Беларусі.

«Адпаведна, усе сустрэчы, якія ён праводзіць або будзе праводзіць, з'яўляюцца яго асабістай ініцыятывай. Ён дзейнічае як прыватная асоба, а не прадстаўнік дзяржавы», — сказаў Карніенка.

«Чакаецца, што фракцыя будзе патрабаваць ад спадара Шаўчэнкі тлумачэнняў па яго вяртанні», — сказаў Карыненка.

Украіна не прызнае Лукашэнку легітымным прэзідэнтам Беларусі.

У снежні 2020-га Шаўчэнка сустракаўся з Андрэем Савіных, а ў лютым 2021-га пахваліўся візітам на «Усебеларускі народны сход».

Паводле «НН».