У Літве кантрабандыст беларускіх цыгарэт тараніў памежнікаў. Тыя адкрылі агонь

У панядзелак, 1 лістапада, пры самай мяжы з Гродзенскім раёнам Беларусі літоўскія памежнікі заўважылі падазроны аўтамабіль «Audi Q5». На патрабаванне спыніцца кіроўца толькі націснуў на газ, паведаміла літоўская памежная служба.

Памежнікі заблакавалі дарогі ў ваколіцах, і неўзабаве патруль на «Toyota Land Cruiser »перастрэў бегляка ў сямі кіляметрах ад мяжы. Той, аднак, не спыніўся, а павялічыў хуткасць і пратараніў машыну памежнікаў. Удар прыйшоўся ў пярэдні правы бок, адзін службовец атрымаў лёгкія траўмы.

Кантрабандыст збіраўся ўцякаць далей, але адзін з памежнікаў сем разоў стрэліў у маторны адсек «Аўдзі». Машына заглухла і спынілася, а кіроўцу паклалі на зямлю.

Ён аказаўся жыхаром Друскеніцскага муніцыпалітэта. У машыне знайшлі 35 скрынь цыгарэт з беларускімі акцызнымі маркамі — у іх было 17 500 пачкаў.

Кантрабандысту пагражае да 8 гадоў зняволення, з яго ўзялі падпіску аб нявыездзе і адпусцілі.

Паводле «Свабоды».