Следчы камітэт плануе стварыць спецпадраздзяленне па барацьбе з кіберзлачыннасцю

Пра гэта заявіў кіраўнік ведамства Дзмітрый Гара ў эфіры «Беларусь 1».

«Адасобленае падраздзяленне, на якое будуць ускладзеныя функцыі, па-першае, лічбавізацыі ведамства, па-другое (напэўна, гэта асноўнае), процідзеяння кіберзлачыннасці. Гэтыя пытанні ў нас цяпер вельмі актуальныя. І ў хуткім часе, я думаю, мы выйдзем на канкрэтнае рашэнне», — сказаў ён.
Гара заявіў, што «зыходзячы з задач, магчыма, гэта будзе нават галоўнае ўпраўленне».
Таксама ён растлумачыў, што злачынствы ў гэтай сферы ў асноўным звязаныя з крадзяжамі, але ёсць і іншыя: махлярствы, злачынствы ў сферы палавой недатыкальнасці непаўналетніх, злачынствы экстрэмісцкай накіраванасці, гандаль наркотыкамі.