Праваабаронца Наста Лойка ў чарговы раз асуджаная па адміністрацыйным артыкуле
У судзе Першамайскага раёна 14 снежня разгледзелі чарговую адміністрацыйную справу праваабаронцы Насты Лойка. Па выніках суда Насце зноў далі 15 сутак адміністрацыйнага арышту па артыкуле 19.1 (дробнае хуліганства).
Нагадаем, што Наста Лойка павінна была выйсці на волю 12 снежня, пасля адбыцця трох папярэдніх адміністрацыйных арыштаў запар. Але на волі яна так і не з’явілася.
За апошнія 4 месяцы гэта ўжо шосты суд над Настай. Улічваючы новы адміністрацыйны арышт, Наста будзе знаходзіцца ў няволі 90 сутак, адзначае @humanconstanta.
Наста Лойка была затрымана 28 кастрычніка і пазней тройчы асуджана да адміністрацыйнага арышту. На адным з судоў праваабаронца распавядала пра катаванні: супрацоўнік ГУБАЗіКа ўдарыў яе электрашокерам, а адзін з супрацоўнікаў ЦІП вывеў яе ва ўнутраны двор і пакінуў без вопраткі на восем гадзін.
У нядаўнім інтэрв'ю «НЧ», незадоўга да затрымання, Наста Лойка распавяла пра непазбежнасць рэпрэсій, сваё нежаданне з'язджаць за мяжу і асабістую місію па абароне правоў чалавека.
