Павел Севярынец папрасіў мітрапаліта Веньяміна абараніць бел-чырвона-белы сцяг

Палітвязень просіць прадстаўніка Праваслаўнай царквы выступіць за нацыянальны сімвал Беларусі.

Сустаршыня аргкамітэта па стварэнні партыі «Беларуская Хрысціянская дэмакратыя» Павел Севярынец напісаў ліст мітрапаліту Беларускай праваслаўнай царквы Маскоўскага патрыярхату Веньяміну з просьбай заступіцца за бел-чырвона-белы сцяг як хрысціянскі сімвал. Пра гэта ў Фэйсбуку напісала жонка палітвязня Вольга Севярынец, паведамляе «Радыё Свабода».

У 1995 годзе Ніл Гілевіч звяртаўся да мітрапаліта Філарэта з такой жа просьбай — патлумачыць, як ён ставіцца да бел-чырвона-белага сцяга. Філарэт адказаў, што ставіцца станоўча, бо гэта колеры белай плашчаніцы з крывёй Хрыста.

Петыцыя ў абарону бел-чырвона-белага сцяга за некалькі дзён набрала больш за 100 тысяч подпісаў. Акрамя таго, студэнты і выкладчыкі БДУ, а таксама гісторыкі прасілі спыніць падрыхтоўку законапраектаў аб прызнанні сімвалу экстрэмісцкім. Пра такую падрыхтоўку раней паведамляла Генпракуратура.

Калектыўную заяву, у якой просяць прызнаць бел-чырвона-белую сімволіку экстрэмісцкай і, адпаведна, забараніць яе, падпісалі ўсяго каля 100 чалавек.

Улады адказалі на петыцыю супраць прызнання бел-чырвона-белага сцяга экстрэмісцкім, якую падпісалі 103 тысячы чалавек. Пракуратура заявіла, што не можа самастойна прызнаць БЧБ-сцяг экстрэмісцкім. Дэпутат Палаты прадстаўнікоў Ігар Марзалюк паведаміў, што распрацоўкі падобнага заканадаўчага акта няма ў плане падрыхтоўкі на 2021 год.