Хронікі рэпрэсій, 3 мая. За два месяцы да вызвалення супраць Змітра Дашкевіча распачалі новую крымінальную справу

Рэжым працягвае помсціць сумленным беларусам. Распавядаем галоўнае, што стала вядома пра палітвязняў сёння. 

Супраць Змітра Дашкевіча распачалі новую крымінальную справу — па мінулай яму заставалася адбыць два месяцы

Пра гэта ў Facebook паведамляе ягоная жонка Наста Дашкевіч. Вядома, што Змітру інкрымінаваны «народны» артыкул 342 КК (Арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх).

Нагадаем, актывіста разам з жонкай Настай абвінавацілі ва ўдзеле ў акцыі пратэсту 23 жніўня 2020 года. 14 ліпеня 2022 года Змітру прызначылі 1,5 года калоніі, а Насце — 3 гады «хатняй хіміі».

Палітзняволены актывіст павінен быў выйсці на волю з папраўчай калоніі № 14 па заканчэнні тэрміну 11 ліпеня. Але адразу па выхадзе яго затрымалі ў межах новай крымінальнай справы па арт. 411 КК — «Злоснае непадпарадкаванне патрабаванням адміністрацыі калоніі». Суддзя Таццяна Дзеравянка прызначыла палітвязню яшчэ адзін год калоніі ва ўмовах строгага рэжыму.

ГУБАЗіКаўцы са сцягам СССР і георгіеўскай стужкай затрымалі гродзенскага айцішніка

Праўладныя тэлеграм-каналы апублікавалі відэа затрымання жыхара Гродна. Паводле «Нашай Нівы», гаворка пра 29-гадовага Дзмітрыя Глушчанку.

Хлопца абвінавачваюць ва ўдзеле ў пратэстах. Сцвярджаецца, што ён нядаўна вярнуўся ў Беларусь з Польшчы.

На відэа затрымання трапіў супрацоўніка ГУБАЗіК, які на спіну начапіў сцяг СССР і георгіеўскую стужку.

Мінскага маркетолага асудзілі за ўдзел у мірным сходзе

Стала вядома, што 18 красавіка ў судзе Партызанскага раёна Мінска вынесены прысуд маркетолагу Аляксандру Самайловічу. Яго абвінавацілі паводле ч. 1 арт. 342 Крымінальнага кодэксу. 

Суддзя Аляксандр Супічэнка прызнаў яго вінаватым і асудзіў да двух з паловай гадоў абмежавання волі без накіравання ў ПУАТ — «хатняй хіміі». Да пасяджэння мужчына знаходзіўся пад вартай, яго вызвалілі пасля абвяшчэння прысуду. 

Вядома, што Самайловіч прызнаў віну. У пастанове суда адзначана, што наўмыснасць яго дзеянняў «з прычыны ягоных унутраных пратэсных перакананняў» нібыта даказваецца тым, што ён сфатаграфаваўся з нацыянальным сцягам — «атрыбутам пратэснай накіраванасці і ягоных палітычных поглядаў».

Супраць гродзенскіх сясцёр, якія праз балоты збягалі з краіны, распачалі спецвытворчасць — іх збіраюцца судзіць завочна

Следчы камітэт паведамляе, што Надзеі Сцепанцовай і Жанне Захаркевіч інкрымінаваная ч. 2 арт. 361-4 КК (Садзейнічанне экстрэмісцкай дзейнасці). Іх запрашаюць вярнуцца ў Беларусь і прыйсці ва Упраўленне СК па Гродзенскай вобласці.

У 2021-ым годзе сясцёр асудзілі да «хіміі» за ўдзел у акцыі пратэсту 6 верасня 2020 году ў Гродне. Пасля прысуду яны вырашылі з'язджаць з краіны — Жанна і Надзея 12 гадзін ішлі па лесе і дрыгве ў бок Літвы. Потым жанчыны трапілі ў фільм Юрыя Дудзя, дзе расказалі пра свае ўцёкі — яго паглядзелі больш за 10 мільёнаў чалавек.

Сілавікі затрымалі жыхара Мінска за ўдзел у пратэстах

На «пакаяльным відэа» мужчына кажа, што ў жніўні 2020-га года некалькі разоў удзельнічаў у мітынгах у раёне стэлы і парка Перамогі. 

Супраць сузаснавальніц мінскага стартап-хаба «Імагуру» распачалі спецвытворчасць — іх збіраюцца судзіць завочна

Таццяне Марыніч і Анастасіі Хамянковай інкрымінаваныя па 9 артыкулаў Крымінальнага кодэксу.

Іх запрашаюць вярнуцца ў Беларусь і прыйсці ва Упраўленне Следчага Камітэта Рэспублікі Беларусь па Мінску.

Палітвязня Андрэя Лапаціна асудзілі да 4 гадоў калоніі за данаты

У Мінскім гарадскім судзе 22 красавіка агучылі прысуд палітзняволенаму Андрэю Лапаціну — чатыры гады пазбаўлення волі ва ўмовах агульнага рэжыму. Суддзя Святлана Чарапанава прызнала яго вінаватым у «фінансаванні экстрэмісцкай дзейнасці» паводле арт. 361-2 Крымінальнага кодэкса.

Андрэя затрымалі напачатку траўня 2023 году, калі ён прыехаў зрабіць перадачу свайму брату Максіму Лапаціну, затрыманаму па справе Мачулішчаў. Да гэтага мужчына жыў у Літве. 

У Брэсце распачаўся чарговы масавы суд за акцыі пратэсту ў жніўні 2020 года

У судзе Ленінскага раёна Брэста 3 траўня пачалі судзіць адразу чатырох чалавек паводле ч. 2 арт. 293 Крымінальнага кодэкса (удзел у масавых беспарадках). Гэта Уладзіслаў Вашчынчук, Вадзім Анціпаў, Станіслаў Дубоўскі, Мікалай Воран. 

Вядома, што Станіслава затрымалі напрыканцы снежня 2023 года, калі ён вырашыў вярнуцца на святы  ў Беларусь з Польшчы, дзе жыў больш за год. Яго затрымалі дома сілавікі ў поўнай экіпіроўцы, а потым запісалі «пакаяльнае відэа».

Справу разглядае Аляксандр Семянчук, на рахунку якога мінімум 34 палітычных прысуды.

Нагадаем, на Берасцейшчыне да гэтага часу працягваюцца масавыя суды за ўдзел у акцыях пратэсту. Так, напрыклад, за апошні месяц вынеслі прысуды ўжо 17 жыхарам Баранавічаў, а на 7 траўня ў Баранавіцкім судзе запланаваны суд над 8 чалавекамі.

Крыніцы: Праваабарончы цэнтр «Вясна»; «Наша Ніва»;