На «Беларуськаліі» працягваюць звальняць удзельнікаў забастоўкі

З "Беларуськалія" звольнілі яшчэ 6 удзельнікаў забастоўкі. Агульная колькасць звольненых у лістападзе нібыта "за прагулы" склала 55 чалавек.

Пра гэта паведамляе афіцыйны тэлеграм-канал прадпрыемства. Ён заклікае "не паддавацца на правакацыі", бо "паход у стачкам" — гэта не часовае мерапрыемства, а рэальныя прагулы і звальненні". І 55 чалавек ужо "страцілі працу і сацыяльны пакет", а на іх месцы прыходзяць "кваліфікаваныя кадры".
У лістападзе амаль штодня па некалькі работнікаў "Беларуськалія" аб'яўлялі пра далучэнне да агульнанацыянальнага страйку. Каб спыніць гэты працэс, кіраўніцтва прадпрыемства пайшло на масавыя звальненні. 19 лістапада стала вядома, што звольнены "за прагулы" 49 страйкоўцаў.
«Еўрарадыё»