Генсек НАТА абвінаваціў Расію ў крывадушнасці пры ацэнцы падзей ва Украіне

Генеральны сакратар НАТА Андэрс Фог Рассмусен лічыць крывадушнасцю параўнанні расійскімі палітыкамі рэвалюцыйнай змены ўлады ва Украіне ў лютым гэтага года з працэсамі, якія зараз адбываюцца ва ўсходніх украінскіх рэгіёнах.



Як перадае карэспандэнт УНІАН з Польшчы, пра гэта ён заявіў у Варшаве ўчора ўвечары перад перамовамі з міністрамі замежных спраў і абароны Польшчы.

«Параўноўваць тое, што адбылося ў лютым у Кіеве, з тым , што адбываецца цяпер на ўсходзе Украіны, з’яўляецца чымсці, што абсалютна ўводзіць у зман, а ў вуснах Расіі — чыстай крывадушнасцю», — сказаў ён.

Рассмусен адзначыў, што захоп ўзброенымі людзьмі адміністрацыйных будынкаў ва ўкраінскіх гарадах на ўсходзе і закладнікаў не адпавядае дэмакратычным стандартам. Ён таксама заявіў, што паводзіны расійцаў не адпавядаюць прынятым у 21 стагоддзі правілам, і Расія выкарыстоўвае «састарэлую рыторыку халоднай вайны».

«Неправамерная і неабгрунтаваная агрэсія Расіі ва Украіне з’яўляецца самым вялікім выклікам для еўрапейскай бяспекі за многія пакаленні. Таму мы ўмацоўваем нашы намаганні, звязаныя з абаронай НАТА, да якога таксама ўваходзіць Польшча», — сказаў ён.

Рассмусен назваў вельмі актуальнымі размовы на тэму ўзмацнення бяспекі НАТА ў цяперашніх умовах, запэўніўшы, што Альянс гатовы рухацца ў гэтым кірунку.

Нагадаем, масавыя акцыі пратэсту ў Кіеве, якія ў лютым прывялі да ўцёкаў з краіны экс-прэзідэнта Украіны Віктара Януковіча, з цяперашнімі падзеямі на ўсходзе краіны параўнаў учора кіраўнік Расіі Уладзімір Пуцін. «Я разумею людзей на паўднёвым усходзе Украіны, якія кажуць: чаму людзям у Кіеве ўсё можна, а мы ніяк не можам абараніць свае правы?», — сказаў Пуцін.