МЗС РФ: цяжка ўявіць, каб «дзяржпераварот» у Беларусі арганізоўваўся без ведама спецслужб ЗША

Масква працягвае выкарыстоўваць заяву пра зрыў планаў па «замаху» на беларускага кіраўніка для антызаходняй прапаганды.

22 красавіка афіцыйная прадстаўніца МЗС Расіі Марыя Захарава заявіла:

— Расследаванне вядзецца па лініі ФСБ Расіі, таму не ў нашай кампетэнцыі гаварыць пра падрабязнасці, тым больш апярэджваць гэтае расследаванне, рабіць высновы пра дачыненне да планаванага, па сутнасці, акта дзяржаўнага тэрарызму ўлад ЗША — гэта будзе прадметам расследавання, безумоўна. Хоць, вядома, цяжка сабе ўявіць, каб акцыі падобнага маштабу арганізоўваліся без ведама амерыканскіх спецслужб. Тым больш, мы ведаем, як фігурантаў гэтай справы кансультавалі ў заходніх сталіцах.

Напярэдадні, 21 красавіка, у пасланні Федэральнаму сходу Уладзімір Пуцін абурыўся, што Захад не асудзіў спробу «замаху» на Лукашэнку. Пры гэтым ён прагаварыўся: «А што было б, калі б спроба дзяржаўнага перавароту ў Беларусі была рэальна зробленая?»

Паводле gazetaby.info