БНФ патрабуе ад уладаў выхаду з АДКБ

Сойм Партыі БНФ прыняў адпаведную заяву ў сувязі з уступленнем у сілу абноўленага Закону Рэспублікі Беларусь «Аб ваенным становішчы». 



Партыя БНФ занепакоеная новай рэдакцыяй закону, які, у прыватнасці разглядае за напад на Рэспубліку Беларусь не толькі дзеянні, наўпрост скіраваныя супраць краіны, але таксама і акт ўзброенай агрэсіі з боку якой-кольвек дзяржавы або групы дзяржаў, здзейснены супраць дзяржавы-удзельніка Арганізацыі Дамовы аб калектыўнай бяспецы (АДКБ).
На думку сябраў Сойму БНФ, новая рэдакцыя закона неапраўдана пашырае паняцце нападу на Рэспубліку Беларусь, увязваючы яго з падзеямі ў Арменіі, Расіі, Таджыкістане (які мае мяжу з нестабільным Аўганістанам) ды іншых краінах АДКБ, у якіх маюцца шматлікія крыніцы нестабільнасці і тэрытарыяльныя канфлікты. «Гэткая трактоўка пагрозаў нацыянальнай бяспецы не адпавядае нацыянальным інтарэсам Беларусі і ставіць унутраную палітыку ў нашай краіне ў залежнасць ад канфліктаў у параўнальна далёкіх ад нашай краіны «гарачых кропках», — гаворыцца ў заяве.
Сябры Сойму Партыі БНФ ў прынятым дакуменце адзначылі, што ўнесеныя ў заканадаўства змены могуць быць адной з праяваў стварэння прававой базы для ўцягвання Беларусі ў шэраг канфліктаў, у тым ліку інспіраваныя агрэсіўнымі правакацыямі з боку расійскіх рэваншыстаў. 
У Партыі БНФ перакананыя, новы закон стварае прававыя падставы для неабгрунтаванага абмежавання правоў і свабодаў грамадзянаў, асабліва ў частцы свабоды слова і вольнага распаўсюду інфармацыі, істотна пашырае межы ваеннай цэнзуры і магчымага выкарыстання спецыяльных сродкаў і зброі.
У сваім звароце Партыя БНФ патрабуе выхаду Рэспублікі Беларусь з АДКБ і выступае за пабудову новай архітэктуры нацыянальнай бяспекі з апорай на супрацу з краінамі Еўраатлантычнай супольнасці.
Нагадаем, 10 студзеня 2015 году ў Закон Рэспублікі Беларусь «Аб ваенным становічшы» былі ўнесеныя змены і дапаўненні, якія, сярод іншага, істотна пашыраюць пералік абставінаў, што кваліфікуюцца ў якасці нападу на Рэспубліку Беларусь і могуць служыць падставай для ўвядзення ваеннага становішча. Гэтыя змены набылі моц 1 лютага 2015 году.
Прэс-служба Партыі БНФ