ISW: Тэмпы наступу расійскіх войскаў на Пакроўскім кірунку замарудзіліся

Расія запаволіла наступ на Пакроўскім кірунку — імаверна, зноў правалілася абяцанне «ўзяць Пакроўск да 7 лістапада». А ў NATO актыўна аналізуюць вайну ва Украіне, і нават пішуць мемуары. Добра было б, каб высновы аналізу не засталіся марнымі. Ідуць 1355-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.

Цягам мінулых сутак ва Украіне зафіксавана 196 баявых сутыкненняў, паведамляе Генштаб УСУ ў зводцы 9 лістапада.

На Пакроўскім кірунку абаронцы Украіны спынілі 73 атакі расійцаў у раёнах Уладзіміраўкі, Ніканораўкі, Чырвонага Ліману, Радзінскага, Мірнаграду, Лісоўкі, Пакроўску, Котліна, Удачнага, Філіі і іншых.

На Паўднёва-Слабажанскім кірунку адбылося 19 боесутыкненняў у раёнах Ваўчанска, Ваўчанскіх Хутароў, Сінельнікавага, Ціхага.

На Аляксандраўскім кірунку Сілы абароны Украіны адбілі 18 штурмаў у раёнах Зялёнага Гаю, Арэстопалю, Сасноўкі, Ворана, Новамікалаеўкі і іншых.

На Славянскім кірунку расійцы 15 разоў атакавалі пазіцыі Сіл абароны Украіны ў раёнах Ямпаля, Серабранкі, Дроноўкі, Выімкі і Фёдараўкі.

На Паўночна-Слабажанскім (Курскім) кірунку зафіксавана 11 боесутыкненняў. На Гуляйпільскім кірунку адбылося 10 атак расіян у раёнах Успенаўкі і Новаўспенаўскае.

* * *

Тэмпы наступлення расійскіх войскаў на Пакроўскім кірунку замарудзіліся, аднак аналітыкі амерыканскага Інстытута вывучэння вайны (ISW) мяркуюць, што ў найбліжэйшыя дні яны зноў могуць узрасці.

Паводле звестак геалакацыйных відэа, расійскія войскі нядаўна нязначна прасунуліся на поўнач Мірнаграда, што з'яўляецца мінімальным поспехам у параўнанні з папярэднімі днямі.

Прадстаўнік 7 корпуса хуткага рэагавання Паветрана-дэсантных войскаў Украіны Сяргей Окішаў адзначыў, што расіяне не спрабуюць замацавацца непасрэдна ў Пакроўску, а працягваюць прарывацца праз горад да яго паўночнай ускраіны. Паводле яго, украінскія падраздзяленні часткова аднавілі лагістыку на поўнач ад Пакроўска і змаглі даставіць туды боепрыпасы.

Украіна ўжо амаль два гады трымае абарону Пакроўска і не збіраецца саступаць горад. У той жа час утрыманне пазіцый у межах горада суправаджаецца вялікімі рызыкамі — у прыватнасці, значнымі стратамі сярод вайскоўцаў і тэхнікі, што крытычна для краіны, якая адчувае недахоп асабовага складу.

Кантроль над Пакроўскам можа адкрыць расіянам шлях да далейшага прасоўвання на захад — у кірунку Днепрапятроўскай і Запарожскай абласцей.

На думку аналітыкаў, адступленне з Пакроўска можа даць украінскім сілам тактычную перавагу, калі ім удасца ўтрымаць пазіцыі паблізу горада да пачатку зімы.

* * *

Расійская армія актыўна канцэнтруе войскі ў раёне Ваўчанска. Там налічваецца каля 600 салдат. Пра гэта «Суспільне Харкаў» паведаміла Руслана Богдан, афіцэр па сувязях з грамадскасцю 57-й асобнай мотапяхотнай брыгады, якая абараняе кірунак.

Паводле яе, лічба ў 600 чалавек уключае як баявы склад, так і параненых, якіх не могуць эвакуяваць. Асноўную ролю ў атаках працягваюць адыгрываць малыя пяхотныя групы: апошні раз маштабны механізаваны штурм з прыцягненнем тэхнікі назіраўся яшчэ летам. Калі пяхота не спраўляецца, расіяне прымяняюць артылерыю, авіяцыю і актыўна выкарыстоўваюць кіраваныя авіяцыйныя бомбы (КАБ).

Што тычыцца складу сіл РФ у Ваўчанску, першы эшалон у асноўным складаецца з былых зняволеных. Яны дрэнна падрыхтаваныя, але колькасць кампенсуе якасць, яны ідуць наперад нават па трупах сваіх саслужыўцаў. Згодна з перахопамі размоў і допытамі палонных, іх камандзіры ставяць ультыматум: альбо ісці наперад, альбо загінуць на месцы.

* * *

У Міністэрстве замежных спраў Украіны папярэдзілі аб ядзернай пагрозе, якая ўзнікла пасля расійскіх атак на аб'екты энергетычнай інфраструктуры. Кіраўнік МЗС Украіны Андрэй Сібіга адзначыў, што расіяне 8 лістапада свядома атакавалі падстанцыі, якія забяспечваюць энергазабеспячэнне Хмяльніцкай і Ровенскай атамных электрастанцый.

Паводле яго, гэтыя ўдары былі старанна спланаванымі дзеяннямі, накіраванымі на стварэнне рызыкі для ядзернай бяспекі Еўропы. Ён падкрэсліў неабходнасць склікаць пасяджэнне Савета кіраўнікоў МАГАТЭ для рэагавання на гэтыя небяспекі.

Украінскі МЗС звярнуўся і да міжнароднай супольнасці, у прыватнасці да такіх краін, як Кітай і Індыя, з заклікам патрабаваць ад Расіі спыніць атакі на аб'екты ядзернай энергетыкі. Міністр падкрэсліў, што такія дзеянні ствараюць патэнцыйную пагрозу катастрофы глабальнага маштабу.

* * *

* * *

З-за доўгага частковага закрыцця ўрада ЗША быў затрыманы экспарт амерыканскай зброі на суму больш за 5 мільярдаў долараў, прызначанай для саюзнікаў па NATO і Украіны, піша Axios.

Паводле звестак выдання, урадавы шатдаўн, які доўжыцца ўжо 40 дзён, паралізаваў працу шэрагу федэральных ведамстваў, у тым ліку бюро Дзярждэпартамента, якое займаецца ўзгадненнем экспартных кантрактаў. З-за гэтага сарваныя або адкладзеныя пастаўкі такіх сістэм, як HIMARS, Aegis і ракет AMRAAM для Даніі, Харватыі і Польшчы. Частка гэтай зброі магла быць перададзена Украіне.

Высокапастаўлены чыноўнік Дзярждэпа заявіў, што сітуацыя «наносіць шкоду як саюзнікам і партнёрам ЗША, так і амерыканскай абароннай прамысловасці». Паводле яго, цяпер у Бюро па палітыка-ваенных пытаннях працуе толькі чвэрць штатных супрацоўнікаў, што значна запавольвае афармленне здзелак.

Працэс продажу амерыканскай зброі звычайна не з'яўляецца складаным, але Закон аб кантролі за экспартам зброі патрабуе ўдзелу Кангрэса. З-за адпачынкаў чыноўнікаў, якія павінны інфармаваць камітэты Кангрэса, гэты механізм фактычна спыніўся.

Старшыня Сенацкага камітэта па міжнародных адносінах Джэймс Рыш падкрэсліў, што з-за бюракратычнай паўзы «Кітай і Расія атрымліваюць перавагу, тады як абаронная база ЗША губляе пазіцыі, а саюзнікі застаюцца без неабходнага ўзбраення».

* * *

Былы генеральны сакратар NATO Енс Столтэнберг у сваіх мемуарах назваў «балючым момантам» адмову ў 2022 годзе на просьбу прэзідэнта Украіны Уладзіміра Зяленскага закрыць неба над краінай, піша The Times.

Столтэнберг успомніў, што Зяленскі тэлефанаваў яму з бункера ў Кіеве, калі горад быў пад пагрозай наступлення расійскіх сіл. Па словах экс-генсека, прэзідэнт прасіў забараніць палёты расійскіх самалётаў, беспілотнікаў і верталётаў над Украінай.

«Я прымаю, што вы не дасылаеце наземныя войскі... Але, калі ласка, зачыніце паветраную прастору», — сказаў тады Зяленскі.

Столтэнберг патлумачыў, што закрыццё неба над Украінай было «немагчымым», бо патрабавала б папярэдняга знішчэння расійскіх сістэм СПА ў Расіі і Беларусі. Інакш самалёты NATO не маглі б бяспечна дзейнічаць ва ўкраінскай паветранай прасторы.

Ён падкрэсліў: у выпадку збіцця расійскага самалёта NATO фактычна аказалася б у стане наўпроставага ваеннага сутыкнення з Масквой. Як тады заяўляў былы прэзідэнт ЗША Джо Байдэн, заходнія лідары не былі гатовыя рызыкаваць маштабнай вайной дзеля Украіны.

У той жа час Столтэнберг прызнаў, што заходняя дапамога Украіне была недастатковай і запозненай. На яго думку, калі б Кіеў атрымаў больш ваеннай падтрымкі напачатку вайны, магчыма, поўнамаштабнага ўварвання ўдалося б пазбегнуць — тады б расійскі дыктатар Уладзімір Пуцін, верагодна, зразумеў, што напад на ўзброеную Украіну немагчымы.

* * *

Міністр абароны Германіі Борыс Пісторыус заклікае зрабіць краіну «гатовай да вайны» на фоне росту пагрозы з боку Расіі, піша The Washington Post.

Міністр застаецца самым папулярным палітыкам у ФРГ — нават нягледзячы на супраціў унутры сацыял-дэмакратычнай партыі. Пісторыус адзначае, што Германія павінна ўмацаваць абарону, бо агрэсіўная палітыка Масквы і заклікі ЗША да большай самастойнасці Еўропы ў сферы бяспекі патрабуюць канкрэтных дзеянняў.

Пасля Другой сусветнай вайны краіна пазіцыянавала сябе як «мірны праект», аднак сёння эксперты прызнаюць, што Бундэсвер застаецца недаўкамплектаваным і тэхнічна адсталым. Арміі не хапае каля 80 тысяч ваеннаслужачых да запланаваных 260 тысяч, якіх плануюць набраць на працягу наступнага дзесяцігоддзя.

Каб часткова вырашыць праблему камплектавання, Пісторыус прапанаваў мадэль добраахвотнай службы — кампраміс паміж пазіцыяй партыі, якая выступае супраць прымусовага прызыву, і неабходнасцю ўзмацніць армію.

У той жа час начальнік абароны Германіі Карстэн Броер заявіў, што ФРГ вывучае ход поўнамаштабнай вайны ва Украіне, каб у будучыні не даць Расіі чакання хуткай перамогі ў будучых канфліктах. «Расія ніколі не павінна меркаваць, што яна можа выйграць вайну супраць NATO, або аднаго з членаў Альянсу», — сказаў ён.