Шуміліна: тры з паловай гады «хіміі» за пагрозу гвалту і абразу
Дзве з трох экспертыз паведамлення Кулакова ў месенджары паказалі, што пагроз і абразаў у іх не было, згодна з трэцяй, пагроза прысутнічала.
18 снежня суд Шумілінскага раёна агучыў прысуд у адносінах да Дзмітрыя Кулакова — жыхара Шуміліна, бацькі дваіх малых дзяцей. Яго абвінавацілі па артыкулах 364 і 369 Крымінальнага кодэкса і пакаралі абмежаваннем волі з накіраваннем ва ўстанову адкрытага тыпу тэрмінам на тры з паловай гады. Дзяржабвінаваўца прасіў шэсць гадоў пазбаўлення волі ў калоніі агульнага рэжыму.
Справу разглядала суддзя Кацярына Унуковіч. Дзяржабвінавачанне падтрымліваў намеснік пракурора Шумілінскага раёна Арсеній Дзянісаў.
Адвакат — Наталля Станкевіч.
Пацярпелы — маёр міліцыі Іван Патоцкі.
Суд Шумілінскага раёна абвінаваціў Дзмітрыя Кулакова ў тым, што ў жніўні абражаў і пагражаў гвалтам супрацоўнікам міліцыі ў суполцы аднаго з месенджэраў "Лепель для жыцця" — 364 артыкул Крымінальнага кодэкса і 369 артыкул Крымінальнага кодэксу.
Дзмітры Кулакоў прызнаў віну часткова: у той частцы, якая датычыцца артыкула 369. Але сказаў, што не меў намеру нікога абразіць. Ён таксама адзначыў, што не прызнае віну па артыкуле 364, таму што супраць гвалту і фізічнага ўздзеяння. Адвакатка адзначыла, што тры з чатырох паведамленняў пісаліся на эмоцыях пасля затрымання і знаходжання абвінавачанага ў ІЧУ у жніўні і датычыліся менавіта гэтых абставінаў, а не Патоцкага.
Дзве з трох экспертыз паведамлення Кулакова ў месенджары паказалі, што пагроз і абразаў у іх не было, згодна з трэцяй, пагроза прысутнічала.
Дзяржабвінаваўца прызнаў віну Кулакова поўнасцю даказанай і запытаў шэсць гадоў пазбаўлення волі ў калоніі агульнага рэжыму. Ён адзначыў, што дзеянні абвінавачанага падрываюць аўтарытэт улады і перашкаджаюць яе працы. Таксама Дзянісаў падкрэсліў, што пацярпелы ўспрыняў пагрозы як рэальныя.
"Я здзяйсняў розныя ўчынкі ў сваім жыцці, але не хацеў абразіць маёра Патоцкага, — сказаў Дзмітры Кулакоў у апошнім слове. — У мяне сям'я: праз гэтыя шэсць гадоў малодшае дзіця нават не ўспомніць мяне".