СК не ўгледзеў злачынства ў збіцці Дзмітрыя Серады супрацоўнікамі міліцыі
Упраўленне Следчага камітэта па горадзе Мінску адмовіла ва ўзбуджэнні крымінальнай справы супраць супрацоўнікаў міліцыі, якія ўчынілі гвалтоўнае затрыманне ў кватэры ўрача-педыятара Дзмітрыя Серады ў жніўні гэтага года.
Пацярпелы ад міліцэйскага самавольства Дзмітрый Серада
З дапамогай праваабаронцаў "Вясны" Дзмітрый Серада накіроўваў скаргу ва Упраўленне Следчага камітэта па Мінску з просьбай выявіць і прыцягнуць да адказнасці асоб, якія аддалі распараджэнне правесці штурм яго кватэры і затрымаць яго ў якасці падазраванага па крымінальнай справе, а таксама тых, хто збіваў яго пры затрыманні і дастаўцы ў РУУС Завадскога раёна Мінска 4 жніўня.
Праз два месяцы ў адказ на сваю скаргу заяўнік атрымаў пастанову аб адмове ва ўзбуджэнні крымінальнай справы за подпісам следчага аддзела па расследаванні злачынстваў супраць інтарэсаў службы УСК па горадзе Мінску А.В. Супічэнка, узгодненае начальнікам аддзела А.В. Івановым.
Як паведамляецца ў пастанове, падчас праверкі па скарзе оперупаўнаважаныя аддзела крымінальнага вышуку Завадскога РУУС Мінска Аляксандр Нушчык і Дзмітрый Шкульков сцвярджалі, што затрыманне Дзмітрыя Серады праводзілася "ў адпаведнасці з дзеючым заканадаўствам", і адмаўляюць прымяненне гвалту ў дачыненні да яго. Начальнік Завадскога РУУС А.В. Германовіч таксама растлумачыў, што рашэнне аб прыцягненні да затрымання супрацоўнікаў АМАПа ГУУС Мінгарвыканкама оперупаўнаважаным Нушчыкам "было прынятае абгрунтавана". Самі супрацоўнікі АМАПу таксама сцвярджаюць, што "якога-небудзь гвалту ў адносінах да затрыманага з іх боку не ўжывалася", а "для пераадолення магчымага супраціву" з боку Серады выкарыстоўваліся кайданкі і фізічная сіла, "неабходная для фактычнага затрымання, у выглядзе загіну рукі за спіну".
Таксама ў пастанове паведамляецца, што дыягназы — "Закрытая чэрапна-мазгавая траўма лёгкай ступені: страсенне галаўнога мозгу ад 2016/08/04, удар мяккіх тканін галавы, удар пярэдняй брушной сценкі", усталяваны Гарадской клінічнай бальніцай №10, і "Страсенне галаўнога мозгу", усталяваны 9 жніўня 17-й гарадской клінічнай паліклінікай — заключэннем загадчыка неўралагічным аддзяленнем 10-й ГКБ Івановым А.В. прызнаныя неабгрунтаванымі, а шматлікія цялесныя пашкоджанні і ранкі, зафіксаваныя заключэннем судова-медыцынскай экспертызы ад 2016/09/14 аддзела агульных экспертыз №1, аднесены "да катэгорыі лёгкіх, якія не прывялі да кароткачасовага расстройства здароўя".
Атрымліваецца, што шматлікія цялесныя пашкоджанні ў заяўніка ёсць, а вінаватых у іх прычыненні няма - і следчага, які праводзіў праверку, гэты факт не бянтэжыць. Але Дзмітрый Серада не мае намеру мірыцца з такім становішчам спраў і будзе падаваць скаргі кіраўніцтву СК і ў пракуратуру з патрабаваннем ліквідаваць існуючыя сур'ёзныя супярэчнасці.
Нагадаем, раніцай 4 жніўня ў кватэру Дзмітрыя Серады, выбіўшы ўваходныя дзверы і шкло гаўбечнай дзверы ў кухні, уварваліся невядомыя ў масках, паклалі яго тварам у падлогу, заламалі рукі за спіну, апранулі кайданкі і, працягваючы збіваць у спецаўтатранспарце, даставілі ў РУУС Завадскога раёна Мінска. Затрыманы быў дапытаны ў якасці падазраванага ў хуліганстве на падставе ч. 1 арт. 339 Крымінальнага кодэкса і адпушчаны толькі на наступны дзень, так як у следчага «адпалі падставы для далейшага ўтрымання яго пад вартай».