Мінскія бальніцы павялічваюць закупкі мяшкоў для трупаў

Некаторыя мінскія бальніцы, якія прымалі «кавідных» пацыентаў, сур’ёзна павялічылі закупкі патолагаанатамічных мяшкоў. Гэта можна зразумець па тэндарах, размешчаных на сайце goszakupki.by.

17 сакавіка 2020 года 1-я гарадская клінічная бальніца хацела закупіць «мяшкі для паталагаанатамічнага матэрыялу» ў колькасці 500 штук за 6 тысяч рублёў. Забяспечваць імі бальніцу патэнцыйны пастаўшчык, згодна з умовамі конкурсу, павінен быў з 1 красавіка да 25 снежня 2020 года, паведамляе «Еўрарадыё».

У 2021 годзе гэтая ж бальніца хоча купіць ужо 1200 мяшкоў для трупаў — за 10 тысяч 800 рублёў. Гэта ў 2,4 раза больш!

Дзеля справядлівасці адзначым, што сёлета мяшкі патрабуюцца не з 1 красавіка, а з 1 лютага, гэта значыць, на два месяцы раней. Але так ці інакш, сёлета бальніца закупляе значна больш мяшкоў. У 2020-м за час пастаўкі выходзіла ў сярэднім па 55 мяшкоў на месяц, а ў 2021-м — ужо па 109 мяшкоў.

5-я гарадская клінічная бальніца ў 2020 годзе шукала, дзе б купіць 700 мяшкоў за 6200 рублёў. Пастаўляць іх павінны былі з 24 лютага і да канца года.

У тэндары 2021 года патрабуецца ўжо 1050 мяшкоў за 8400 рублёў. Пастаўка патрэбная на месяц раней — з 19 студзеня. Гэта значыць, летась трацілі ў сярэднім па 77 мяшкоў у месяц, на 2021-ы закупляюць па 95.

Сталічная бальніца хуткай медыцынскай дапамогі летась затарылася мяшкамі для трупаў на 22 тысячы 800 рублёў. 1900 мяшкоў ім пастаўлялі з 29 красавіка да 31 снежня. Гэта значыць, закупка праводзілася зыходзячы з 210 мяшкоў у месяц.

Сёлета БХМД купляе 2500 мяшкоў за 37 тысяч 500 рублёў. Тэрмін пастаўкі — з 22 сакавіка і да канца года, а гэта — прыкладна 250 мяшкоў у месяц.

COVID-19 прыйшоў у Беларусь больш за год таму. Дзяржпрапаганда за гэты час паспела прайсці некалькі стадый: ад адмаўлення (падтакваючы Лукашэнку і яго азначэнню «каронапсіхоз») да прыняцця — маўляў, праблема ёсць, але ў нас усё не так дрэнна, як у іншых краінах.

Паводле афіцыйнай статыстыкі на 16 сакавіка, ад ускладненняў, выкліканых каронавіруснай інфекцыяй, у Беларусі памерлі 2112 пацыентаў. Прычым чыноўнікі з Мінздароўя нібы кантралююць смяротнасць ад COVID-19: яна можа не мяняцца тыднямі. Напрыклад, з 14 да 27 лютага яна, як пад лінеечку, складала дзевяць смярцей у дзень.

Але, як вынікае з тэндарных звеста,к толькі па трох мінскіх бальніцах сёлета закупляецца на 1650 паталагаанатамічных мяшкоў больш, чым летась. Адкуль такі рост, калі, паводле афіцыйнай статыстыкі, пасля COVID-19 у Беларусі памірае ў межах 11 чалавек у дзень?