Даверанасць прадстаўляць інтарэсы асуджанага да смерці ў ААН не прапускаюць

Тысячы грамадзян з многіх краін свету адгукнуліся на заклік міжнароднай арганізацыя Amnesty International, якая распаўсюдзіла тэрміновы зварот да прэзідэнта Лукашэнкі з заклікам спыніць смяротнае пакаранне ў Беларусі. Лісты з заклікам адмяніць смяротны прысуд Генадзю Якавіцкаму перададзеныя яго дачцэ

Аўтарытэтная праваабарончая арганізацыя прапанавала звярнуцца да Аляксандра Лукашэнкі і заклікаць яго адмяніць смяротны прысуд Генадзю Якавіцкаму, а таксама ўвесці мараторый на прывядзенне прысудаў у выкананне з мэтай адмены смяротнага пакарання.
 

4 красавіка Вярхоўны суд Беларусі пакінуў у сіле смяротны прысуд, вынесены ў дачыненні да жыхара Вілейкі Генадзя Якавіцкага, якому пагражае расстрэл.
Генадзь Якавіцкі быў прысуджаны да смерці 5 студзеня, пасля таго як ён быў прызнаны вінаватым у забойстве сужыцелькі ў чэрвені 2015 года. Гэта быў першы смяротны прысуд, вынесены ў 2016 годзе.
Копіі лістоў-заклікаў з Канады, Францыі, Вялікабрытаніі, Галандыі, ЗША, Аўстраліі і іншых краін свету штодзень прыходзяць на адрас Праваабарончага цэнтру “Вясна”.
30 чэрвеня каардынатар кампаніі “Праваабаронцы супраць смяротнага пакарання” Андрэй Палуда сустрэўся са сваякамі Генадзя Якавіцкага і перадаў лісты ягонай дачцэ Аляксандры.
 

Аляксандра выказала шчырую падзяку праваабаронцу за падтрымку і салідарнасць са сваякамі, а таксама паведаміла некаторыя навіны, датычныя яе бацькі, які знаходзіцца ў камеры смяротнікаў.
Так, у прыватнасці, з размовы стала вядома, што ад Генадзя Якавіцкага амаль два месяцы як перасталі прыходзіць лісты. Аляксандра, якая атрымала спатканне з бацькам, даведалася ад яго, што гэта здарылася пасля таго, як Генадзь Якавіцкі напісаў сваякам, што давярае прадстаўляць свае інтарэсы ў Камітэце ААН па правах чалавека, куды ён імкнецца звярнуцца са скаргай, кіраўніку кампаніі “Праваабаронцы супраць смяротнага пакарання” Андрэю Палуду.

Праваабаронцы лічаць, што такім чынам адміністрацыя СІЗА №1 не дае магчымасці асуджанаму да смяротнага пакарання Генадзю Якавіцкаму рэалізаваць яго канстытуцыйныя правы.
spring96.org