Андрэй Бастунец: Крымінальныя справы – гэта ўжо праз край

Усім відавочна, што журналісты проста выконвалі свае прафесійныя абавязкі, і ні пра які крымінальны пераслед гаворка наогул не павінна ісці, сказаў кіраўнік БАЖ пра суды над незалежнымі журналістамі.

Кіраўнік Беларускай асацыяцыі журналістаў Андрэй Бастунец пракаментаваў «Радыё Рацыя» апошнія факты ціску на незалежных журналістаў.
Нагадаем, што працягваецца судовы працэс над журналісткамі тэлеканала “Белсат” Дар’яй Чульцовай і Кацярынай Андрэевай. Хутка пачнецца суд над журналісткай TUT.BY Кацярынай Барысевіч. За кратамі знаходзяцца многія іншыя прадстаўнікі СМІ, некаторых штрафуюць і адпраўляюць на “суткі”.

Андрэй Бастунец адзначыў:

— І справа журналістак “Белсата”, і справа Кацярыны Барысевіч маюць да крыміналу вельмі ўскоснае дачыненне, і толькі таму, што выкарыстоўваюцца юрыдычныя механізмы. Хаця ўсім відавочна, што дзяўчаты проста выконвалі свае прафесійныя абавязкі, і ні пра які крымінальны пераслед гаворка наогул не павінна ісці.

У горшым выпадку, можна было б казаць пра завядзенне адміністрацыйнага працэсу, але крымінальныя справы — гэта ўжо праз край.

— Журналісты ў Беларусі трапляюць пад крымінальны пераслед не першы раз.

— Так, гэта доўжыцца на працягу ўсяго існавання незалежнай Беларусі, але, відаць, ніколі маштаб рэпрэсій у дачыненні да незалежных СМІ не набываў такі масавы характар.

— На ваш погляд, які прысуд можа быць вынесены журналісткам?

— Нельга нічога спрагназаваць, бо тут усё залежыць ад таго, які будзе загад зверху. Я вельмі хацеў бы, каб нашы калегі былі як мага хутчэй на волі, але не ведаю, наколькі гэта магчыма ў сучаснай Беларусі пры сённяшнім рэжыме.