«Паўднёвага патоку» не будзе. Расія вырашыла будаваць газаправод праз Турэччыну, а не праз Баўгарыю

Расія не абмяркоўвае магчымасці будаўніцтва газаправода па дне Чорнага мора праз Баўгарыю, заявіў міністр энергетыкі РФ Аляксандар Новак.

Здымак Reuters
Паводле ягоных слоў, будаўніцтва газаправоду па дне Чорнага мора — «Паўднёвага патоку» — сёння не абмяркоўваецца.
«Па Баўгарыі не абмяркоўваем цяпер, у нас «Паўднёвага патоку“ няма», — цытуе Новака РІА «Новости».
У той жа час Расія і Турэччына аднаўляюць перамовы па праекце газаправоду «Турэцкі паток». Намеснік кіраўніка «Газпрома» Аляксандар Мядзведзеў заявіў, што разам са сваім начальнікам Аляксеем Мілерам яны прымуць удзел у працы над праектам, перадае 24news.com.ua.
«Яны [перамовы] ўжо фактычна ідуць, гэты працэс пачаўся яшчэ на сустрэчы міністра эканомікі Турэччыны і міністра энергетыкі Расіі. Былі дасягнутыя дамоўленасці пра аднаўленне гэтага працэсу», — заявіў Аляксандар Мядзведзеў.
Аднак, як піша Euroobserver, будучыня ў абодвух праектаў нявызначаная праз падзенне попыту на газ, нізкія цэны і заканадаўчыя складанасці з будаўніцтвам трубаправодаў.
Паводле «Радыё Свабода»