У Маскве дазволілі «маўклівы пратэст» без выяўлення «асаблівых пачуццяў»
Маскоўскія ўлады фактычна дазволілі правесці прыхільнікам апазіцыянера Аляксея Навальнага акцыю 12 чэрвеня на Цвярской вуліцы Масквы. Аднак Навальнага затрымалі.
Затрымліваюць Аляксея Навальнага ў Маскве. 12 чэрвеня 2017 года
Як заявіў радыё «Эхо Москвы» кіраўнік дэпартаменту
рэгіянальнай бяспекі Уладзімір Чэрнікаў, паліцыя не будзе затрымліваць людзей,
якія «шпацыруюць» па вуліцы без плакатаў і выкрыквання лозунгаў.
«Калі чалавек прыйдзе з плакатам палітычнага зместу або будзе выкрыкваць лозунгі, ён 100% патэнцыйны „кліент“ паліцыянтаў, — удакладніў Чэрнікаў. — Калі грамадзяне спакойна шпацыруюць і праяўляюць пачуццё салідарнасці з бальшынёй людзей, якія прыйдуць адзначаць Дзень Расіі, усё будзе спакойна і добра. Калі яны будуць праяўляць „асаблівыя“ пачуцці, паліцыя можа іх заўважыць».
На 13:00 паведамляецца аб затрыманні 40 чалавек, акцыя Навальнага мае пачацца а 14-й. Затрыманы і сам Аляксей Навальны.
На Цвярской у Маскве, а таксама ў шэрагу гарадоў Расеі планаваліся ўрачыстасці на Дзень Расіі — гадавіну прыняцця дэкларацыі аб дзяржаўным суверэнітэце РСФСР 12 чэрвеня 1991 году. Ад 1991 году гэты дзень выходны, ад 1992-га — дзяржаўнае свята.
Але на той жа час, што ўрачыстасці, свае акцыі запланаваў палітык Аляксей Навальны: ягоная акцыя прысвечаная барацьбе з карупцыяй і патрабаванням тлумачэнняў фактаў пра прэм’ера Дзмітрыя Мядзведзева, выкладзеных у фільме «Ён вам не Дзімон».
Маскоўскія ўлады ўзгаднілі акцыю Навальнага на праспекце Сахарава (што ў 2 км ад Чырвонай плошчы, Цвярская ж — у 500 м), ды Навальны заявіў, што не змог ні з кім дамовіцца пра ўсталяванне сцэны, таму перанёс акцыю на Цвярскую. Шэраг антыкарупцыйных акцыяў адбываецца ў іншых гарадах Расіі.