Мюнхен згодны прыняць мігрантаў з беларуска-польскай мяжы

Улады Мюнхена заявілі, што «больш не могуць глядзець на тое, як людзі застаюцца на мяжы ЕС без перспектыў і ў нявызначанасці» і прапанавалі прыняць мігрантаў, якія знаходзяцца на беларуска-польскай мяжы. Пра гэта паведамілі ў эфіры польскага тэлеканала «Polsat».

«Для сталіцы Баварыі выратаванне чалавечых жыццяў мае найвышэйшы прыярытэт. У сувязі з гэтым мы ў чарговы раз прапануем хутка і без лішняй бюракратыі прыняць людзей, якія затрымаліся на мяжы, у Мюнхене і на месцы забяспечыць ім доступ да адпаведных працэдур, што тычацца атрымання прытулку», — гаворыцца ў паведамленні, апублікаваным гарадскімі ўладамі Мюнхена, перадае «Интерфакс-Запад».
Там таксама заявілі, што мігрантаў можна было б прыняць у рамках як рэгіянальных, так і дзяржаўных праграм.
Як паведамляюць нямецкія СМІ, мэр Мюнхена Верэна Дзітль напярэдадні заявіла прэсе пра гатоўнасць прыняць мігрантаў на нямецкай зямлі.
Нагадаем, 8 лістапада да беларуска-польскай мяжы прыбыло некалькі тысяч мігрантаў. Пасля няўдалых спроб прарвацца праз агароджу яны разбілі намётавы лагер і застаюцца там дагэтуль.