Катастрофа MH17: Bellingcat назваў афіцэра, які даставіў «Бук» ва Украіну

Дастаўку зенітна-ракетнай устаноўкі «Бук», з якой быў збіты малайзійскі «Боінг» рэйса MH17 над Данбасам у ліпені 2014 года, арганізаваў адстаўны расійскі генерал-маёр Сяргей Дубінскі. Пра гэта заявіла ў сваім дакладзе міжнародная экспертна-журналісцкая група Bellingcat.

Паводле звестак групы, Дубінскі, нібыта, вядомы таксама як баец так званай «ДНР» пад пазыўным «Хмуры». Ён нарадзіўся ў Данецку, служыў у Афганістане, а цяпер які жыве ў Растоўскай вобласці. Прынамсі да 2014 года Дубінскі служыў у расійскім ГРУ.
Таксама эксперты паведамілі, што дастаўкай «Бука» займаліся вайскоўцы 69-й асобнай брыгады матэрыяльна-тэхнічнага забеспячэння ўзброеных сіл Расіі. Такую выснову яны зрабілі, вывучыўшы фатаздымкі у сацсетках вайскоўцаў, зробленыя ў Растоўскай вобласці падчас транспарціроўкі «Бука».
Эксперты Bellingcat падкрэсліваюць, што пакуль не ўдалося дакладна выявіць, хто менавіта кіраваў устаноўкай «Бук». Аднак, па іх словах, вядомыя ўсе расійскія вайскоўцы, якія следавалі з ёй па тэрыторыі Украіны.
Група Bellingcat падрыхтавала два даклады з новымі падрабязнасцямі па катастрофе малайзійскага «Боінга» ў 2014 годзе пад Данецкам. Адзін з іх прысвечаны асобе «Хмурага». Другі перасланы галандскім следчым, якія расследуюць катастрофу, і для публікацыі не прызначаны.

Расійскае Мінабароны неаднаразова рэзка крытыкавала працу групы Bellingcat, а таксама яе даклады.
Нагадаем, што катастрофа з малайзійскім «Боінгам» рэйса MH17 адбылася 17 ліпеня 2014 года. Самалёт быў збіты з зенітна-ракетнага комплексу «Бук», пры гэтым загінулі ўсе 298 чалавек, якія былі на борце. Пераважная большасць з іх была грамадзянамі Нідэрландаў, таму следчыя гэтай краіны ўзначальваюць міжнароднае расследаванне катастрофы.

Паводле Еўрарадыё