Дасье ў карыкатурах: Справа Ассанжа

У Лондане 11 красавіка быў арыштаваны Джуліян Ассанж — кіраўнік легендарнага праекта WikiLeaks (англ. Wiki&leak — «уцечка») — міжнароднага сеткавага праекта для ананімных публікацый інфармацыйных ўцечак.

Сайт WikiLeaks, які працуе з 2006-га, быў заснаваны міжнароднай групай незалежных актывістаў, якія публікавалі выкрадзеныя хакерамі дакументы. Як правіла, яны распавядалі аб ваенных злачынствах, карупцыі, цэнзуры і закулісных здзелках палітычных элітаў. Больш за ўсіх даставалася Штатам. Напрыклад, сярод матэрыялаў быў шакавальны відэазапіс расстрэлу бяззбройных падлеткаў і журналістаў амерыканскімі войскамі ў Іраку. Як вынік, дасюль хапае тых, хто лічыць Ассанжа звязаным з расійскімі спецслужбамі. Напрыклад, аўстрыйскі карыкатурыст Мар'ян Камінскі апублікаваў у свой час малюнак, на якім Пуцін, Ассанж і Трамп дзеляць ложак.

Неўзабаве паляванне за Ассанжам стала прыярытэтам для Вашынгтона. Лічыцца, што па замове амерыканцаў дзве шведкі абвінавацілі яго ў згвалтаванні. Ассанжа, які ў той час знаходзіўся ў Лондане, ад арышту і экстрадыцыі выратаваў эквадорскі левы ўрад Рафаэля Карэа. Карэа загадаў пасольству схаваць хакера. Паводле папулярнай версіі, Карэа пайшоў на такі крок, каб адпомсціць ЗША. Справа ў тым, што назва гэтай лацінаамерыканскай краіны асацыявалася ў амерыканцаў выключна з сумна вядомым тэрмінам «бананавая рэспубліка». На той час нават быў папулярны жарт пра тое, што менавіта Ассанж стане пераемнікам Карэа. 

Праз час у Эквадоры прыйшоў да ўлады новы прэзідэнт з рэвалюцыйным імем Ленін. Ленін хутка адмовіўся ад курсу свайго папярэдніка, каб наладзіць добрыя адносіны з Вашынгтонам. На мінулым тыдні ён загадаў дазволіць арышт Ассанжа. Ледзь не адразу Міжнародны валютны фонд пагадзіўся даць Эквадору крэдыт на 4 млрд. долараў. Здраду Леніна праілюстравала нямецкая газета Neue Deutschland

Можна не сумнявацца — арышт Джуліяна Ассанжа і магчымая экстрадыцыя ў Штаты выклікае велізарны пратэстны рэзананс. Праваабаронцы, журналісты і блогеры розных краін ужо выказваюць абурэнне дзеяннямі афіцыйнага Лондана, а хакеры абяцаюць хвалю кампрамату. Тым больш, што ў ЗША чалавека, які апублікаваў дакументы аб ваенных злачынствах і якога вылучалі на Нобеля, магчыма, чакае смяротнае пакаранне.

На першы погляд апісаныя падзеі далёкія ад Сінявокай. Аднак на самай справе афіцыйны Мінск можа зрабіць на гэтым някепскі гешэфт, прадаўшы Амерыцы пару ноў-хаў. Што-што, а рэагаваць на кампрамат беларускія ўлады навучыліся, што адлюстравана ў карыкатуры ад «Новага Часу».