Байдэн з Пуціным сёння абмяркуюць сітуацыю вакол Украіны. Блінкен з Лаўровым ужо пагаварылі

Дзяржсакратар ЗША Энтані Блінкен і міністр замежных спраў РФ Сяргей Лаўроў правялі сёння тэлефонную размову аб сітуацыі вакол Украіны і гарантыях бяспекі. Яна адбылася па ініцыятыве амерыканскага боку.

Паводле інфармацыі прэс-сакратара Дзярждэпартамента Неда Прайса, мэтай Блінкена было абмеркаваць вострыя і агульныя асцярогі з нагоды таго, што Расія можа разглядаць магчымасць пачатку далейшай ваеннай агрэсіі супраць Украіны ў бліжэйшыя дні.

«Міністр даў зразумець, што дыпламатычны шлях да вырашэння крызісу застаецца адкрытым, але ён запатрабуе ад Масквы дээскалацыі і ўдзелу ў добрасумленных дыскусіях. Ён паўтарыў, што калі Масква пойдзе па шляху агрэсіі і ўварвання ва Украіну, гэта прывядзе да рашучага, маштабнага і адзінага трансатлантычнаму адказу», — гаворыцца ў прэс-рэлізе.

У МЗС РФ паведамляюць, што Лаўроў падкрэсліў, што «разгорнутая ЗША і іх хаўруснікамі прапагандысцкая кампанія пра «расійскую агрэсію» супраць Украіны пераследуе правакацыйныя мэты, заахвочваючы ўлады ў Кіеве да сабатажу Мінскіх пагадненняў і згубных спробаў сілавога развязання «праблемы Данбаса».

Ён заявіў, што рэакцыя Вашынгтона і Бруселя на праекты расійска-амерыканскага дагавора і пагаднення з НАТО па гарантыях бяспекі «ігнаруе ключавыя для нас палажэнні, перш за ўсё аб непашырэнні альянсу і неразмяшчэнні ўдарных сістэм узбраенняў паблізу расійскіх межаў».

«Было акцэнтавана, што гэтыя пытанні зоймуць цэнтральнае месца ў нашай ацэнцы атрыманых ад ЗША і НАТА дакументаў, якая будзе даведзена да ведама калег», — гаворыцца ў паведамленні расійскага МЗС.

Паводле інфармацыі ведамства, Лаўроў таксама нагадаў «аб недапушчальнасці дзеянняў, якія парушаюць прынятыя на вышэйшым узроўні абавязацельствы аб непадзельнасці бяспекі ў Еўраатлантыцы».

Падчас гутаркі былі закранулі некаторыя актуальныя пытанні двухбаковых адносін.

Нагадаем, сёння пагаварыць па тэлефоне плануюць таксама Уладзімір Пуцін і Джо Байдэн.

Паводле reform.by.