У футбольнай зборнай Беларусі новы трэнер. Яго «выпісалі» з Руанды

Чарговы крок Беларускай федэрацыі футбола, які цяжка зразумець.

Беларускую зборную па футболе ўзначаліў 48-гадовы іспанскі трэнер Карлас Алас Федэр, пра гэта паведамляе прэс-служба Белрускай федэрацыі футбола. Старшыня арганізацыі, былы лукашэнкаўскі чыноўнік Мікалай Шарснёў падпісаў з трэнерам адпаведнае пагадненне аб супрацоўніцтве.

Адзначаецца, што кантракт разлічаны да канца 2024 года з магчымай опцыяй падаўжэння на адзін сезон у выпадку выканання пастаўленых задач. Такім чынам, іспанскі спецыяліст будзе кіраваць галоўнай футбольнай камандай Беларусі да канца кваліфікацыі чэмпіянату Еўропы-2024 года, а таксама ў розыгрышы Лігі нацый сезона 2024/2025. Поўны склад абноўленага трэнерскага штаба стане вядомы пазней, удакладнілі ў БФФ.

Карлас Алас Ферэр з 2003 па 2009 год пачынаў сваю трэнерскую кар'еру ў структурах іспанскіх футбольных клубаў «Ампоста», «Ракеценк» і «Тартоса». Далей на працягу трох гадоў з 2009 па 2011 быў асістэнтам галоўнага трэнера ў футбольным клубе «Кітчы» з Ганконга. З 2011 па 2014 год працаваў з юніёрскай (U-19) камандай футбольнага клуба «Барселона». Далей была праца галоўным трэнерам у польскім футбольным клубе «Погань» (2015), казахскім «Кайраце» (2017—2018), з якім быў заваяваны Кубак Казахстана, мараканскім футбольным клубе ФАР (2019), катарскім «Катар СК» (2019) і кіпрскім «Эносісе» (2020-2021). З 2015 па 2017 год Карлас Алас Ферэр узначальваў юнацкую (U-17) зборную Казахстана.

З 2022 года і да нядаўняга часу іспанец працаваў з нацыянальнай зборнай Руанды, якая займае ў сусветным рэйтынгу толькі 138 месца, то-бок гэтая каманда значна слабейшая нават за беларускую.

Лукашэнкаўцы хваляцца Гульнямі краін СНД. Чаму гэта цалкам маргінальны спорт

Як зазначае «Трыбуна», новы галоўны трэнер зборнай Беларусі Карлас Алас за апошнія тры гады атрымаў усяго 7 перамог у 34 матчах.

У зборнай Руанды статыстыка ўвогуле жудасная — 0 перамог, 4 матчы ў нічыю і 3 паражэнні.

Тут можа ўзнікнуць пытанне: навошта футбольная федэрацыя ырашыла выпісаць з далёкай Афрыкі спецыяліста, які нічым асаблівым у трэнерскай прафесіі не вызначыўся? Чым ён лепшы за беларуса Георгія Кандрацьева, які кіраваў камандай цягам апошніх некалькіх гадоў? Што адзін прайграваў, то і другі будзе.

Выглядае, што адказ просты. Кіраўнікі федэрацыі і лукашэнкаўскія спартыўныя чыноўнікі давялі футбол да такога стану, што не бачаць выхаду з сістэмнага крызісу. Пазваць у такой сітуацыі іншаземца — гэта як дэклараваць фактычна надзею на нейкі цуд.

Адразу пасля адстаўкі Кандрацьева з’явіліся чуткі, што ў Доме футбола прынцыпова шукаюць на зборную замежнага трэнера. Міжнародны трэнерскі рынак велізарны, там шмат добрых дасведчаных спецыялістаў. Але беларуская зборная, як і ўвесь беларускі футбол, зараз настолькі слабы, што знайсці ахвочага да такой працы змаглі толькі ў Руандзе.