Ангела Меркель пра наплыў мігрантаў з боку Беларусі: Гэта атака на ўвесь Еўрасаюз

Канцлер Германіі выказала Літве падтрымку па пытанні нелегальных мігрантаў.

Германія падтрымлівае Літву, куды прыбываюць мігранты з Беларусі, і асуджае дзеянні ўлад у Мінску. Пра гэта заявіла ў аўторак на прэс-канферэнцыі ў Берліне канцлер ФРГ Ангела Меркель пасля сустрэчы з прэм'ер-міністрам Эстоніі Каяй Калас.

«Мы бачым, што людзі выкарыстоўваюцца як сродак для гібрыднага супрацьстаяння, — сказала яна. — Мы гэта асуджаем самым сур'ёзным чынам». «Гэта атака на ўсіх нас, а не толькі на адну краіну», — дадала Меркель, маючы на ўвазе Еўрапейскі Саюз.

Раней Польшча і Літва звярнуліся з заклікам да ЕС ужыць больш жорсткія меры ўздзеяння ў дачыненні да Беларусі ў сувязі з нібыта справакаваным Мінскам міграцыйным крызісам у рэгіёне, піша ТАСС. З пачатку года на літоўска-беларускай мяжы затрыманыя больш за 4 тысячы нелегальных мігрантаў. Гэта амаль у 50 разоў больш, чым за ўвесь 2020 год. Мігранты таксама прадпрымаюць спробы пранікнуць праз Беларусь у Польшчу. У канцы мая Аляксандр Лукашэнка заявіў, што яго краіна служыла бар'ерам на шляху перакідання нелегальных мігрантаў у суседнюю дзяржаву, аднак з улікам палітычнага ціску Захаду Мінск можа задумацца, ці варта працягваць гэта рабіць.