У межах рэформы ЖКГ у Мінску будзе створана адзіная дыспетчарская служба "115"

У межах рэформы ЖКГ у Мінску будзе створана адзіная дыспетчарская служба "115". Пра гэта на пасяджэнні круглага стала паведаміў генеральны дырэктар ГА "Мінская гарадская жыллёвая гаспадарка" Віталь Смірноў. 



Мерапрыемства было прысвечана эксперыменту па рэформе ЖКГ, які стартуе 1 сакавіка на базе Партызанскага і Першамайскага раёнаў сталіцы. 
Як адзначыў Смірноў, "сёння, калі здараецца аварыя ў доме, яго жыхарам вельмі складана датэлефанавацца ў дыспетчарскую ЖЭСа". Паводле яго слоў, адзіная дыспетчарская служба будзе працаваць кругласутачна і прымаць заяўкі ад насельніцтва незалежна ад раёна пражывання. Потым заяўкі будуць перадавацца адпаведным службам. "Адзіная дыспетчарская служба дазволіць лепш кантраляваць і выкананне заявак", — лічыць Смірноў. 

Смірноў расказаў, што ў межах эксперыменту па рэформе ЖКГ у двух раёнах дзяржаўнае аб'яднанне "Мінская гарадская жыллёвая гаспадарка" будзе пераўтворана ў дзяржаўную ўстанову, з фінансаваннем з бюджэту. Цяпер ГА фінансуецца за кошт адлічэнняў ЖРЭА раёнаў, якія закладваюцца ў фактычны кошт квадратнага метра тэхабслугоўвання. 
Будуць створаны службы замоўца — КУП "Жыллёва-камунальная гаспадарка Першамайскага раёна" і КУП "Жыллёва-камунальная гаспадарка Партызанскага раёна". Іх задача — выконваць функцыі ўпаўнаважанай асобы па кіраванні жыллёвым фондам і прадстаўляць інтарэсы як насельніцтва, так і адміністрацыі раёнаў. "КУП будзе займацца заключэннем дагавораў з падраднымі арганізацыямі і насельніцтвам на тэхабслугоўванне, капітальны рамонт, абслугоўванне ліфтаў, праводзіць таргі. Усе работнікі КУП пройдуць навучанне. Іх праца плануецца поўнасцю гасразліковай", — паведаміў Смірноў.  
Усяго, паводле яго слоў, плануецца стварыць сем ЖЭУ. Яны аб'яднаюць два-тры ЖЭСы. Адно ЖЭУ будзе абслугоўваць ад 600 тыс. да 1 млн. кв. м жылля. Тэхабслугоўваннем і ўборкай тэрыторый зоймуцца асобныя брыгады. 
Акрамя таго, плануецца стварыць у кожным раёне адзінага аператара па ўтылізацыі смецця і стымуляваць яго здабываць другасныя рэсурсы. Плануецца стварыць і адзіны разлікова-даведачны цэнтр, які аб'яднае 43 РДЦ Мінска. Іх функцыі пашырацца, і жыхары змогуць у іх фактычна вырашаць усе пытанні, звязаныя з жыллём. 
"У выніку рэформ будзе зніжана фінансавая нагрузка, зніжаны сабекошт паслуг, скарочана 410 спецыялістаў толькі ў Першамайскім раёне, скарочаны адміністрацыйны апарат на 10%, зэканомлена каля 2,5 млрд. рублёў па адным раёне. Вынікі мы ўбачым на працягу двух-трох месяцаў", — лічыць Смірноў. 
Як паведаміў міністр жыллёва-камунальнай гаспадаркі Аляксандр Церахаў, эксперыментам у Мінску ўжо зацікавіліся ў Гродне і Гомелі. "Эксперымент будзе распаўсюджаны і на іншыя раёны горада, і такая сістэма, калі яна пакажа станоўчыя вынікі, планамерна стане рэальнасцю паўсюль", — адзначыў міністр.
Марына Носава, БелаПАН