У Мінску шматдзетнага бацьку адправілі ў калонію за 5 хвілін у счэпцы ў жніўні 2020 года

26 студзеня 2022 года суд Ленінскага раёна Мінска прысудзіў Сяргея Альшэўскага да двух гадоў пазбаўлення волі ў калоніі агульнага рэжыму. Яго прызналі вінаватым паводле ч.1 арт.342 Крымінальнага кодэкса. Справу разгледзела суддзя Марына Клімчук. Таксама ў калоніі яго прымусова будуць лячыць ад алкагалізму, адзначаюць праваабаронцы.

Пазоў «Мінсктранса» на суму 21 тысяча 667 рублёў 87 капеек будзе разгледжаны ў грамадзянскай вытворчасці.

Сяргея Альшэўскага прызналі вінаватым у тым, што ён браў удзел у «групавых дзеяннях, якія груба парушаюць грамадскі парадак і спалучаныя з яўным непадпарадкаваннем супрацоўнікам міліцыі» — мітынгу 10-11 жніўня 2020 года.

Згодна з абвінавачаннем, ён «публічна незаконнымі спосабамі выказваў свае грамадзянска-палітычныя погляды», далучыўшыся да «групы грамадзян, якія ўдзельнічалі ў супрацьпраўных дзеяннях». Ён «выкрыкваў лозунгі, якія былі накіраваныя на доўгае парушэнне грамадскага спакою, неаднаразова адмаўляўся выканаць патрабаванні супрацоўнікаў АУС, а таксама наўмысна перашкаджаў руху транспарту».

Таксама ў віну яму паставілі «рух у складзе калоны, у тым ліку, счэпцы лакцямі, то-бок, групавым скрыжаванні рук у локцевых суставах» па праезнай частцы.

На пасяджэнні Альшэўскі прызнаў віну. Ён распавёў, што 10 жніўня яго сябар прапанаваў яму паглядзець, што адбываецца на пратэсных маршах у Мінску. У інтэрнэце ён даведаўся, дзе будуць праводзіцца масавыя мерапрыемствы. Калі яны прыехалі ў горад і прыпаркавалі аўтамабіль на адной з вуліц, пешшу накіраваліся ў раён праспекта Пераможцаў, дзе ў гэты час ужо знаходзілася вялікая колькасць людзей. Альшэўскі распавёў, што стаў выходзіць на праезную частку недалёк ад Палаца спорту каля 20.00, і калі яму прапанавалі стаць у счэпку, ён пагадзіўся. Мужчына прастаяў там 5 хвілін, выкрыкваючы лозунг «Жыве Беларусь!», але пасля таго, як заўважыў набліжэнне супрацоўнікаў АУС і спецтэхнікі, уцёк з праезнай частцы дарогі і з'ехаў у родны горад.

Ён удакладніў, што не рабіў удараў рукамі і не ведаў, што мерапрыемства было несанкцыянаваным. Альшэўскі таксама пазнаў сябе на фота з месца падзей: яны сталі асноўнымі доказамі па справе.

Вядома, што ў мужчыны трое малалетніх дзяцей.