У Мінску далі 15 сутак экскурсаводу, яе затрымалі разам з групай. Вось што кажуць відавочцы

У нядзелю ў Мінску затрымалі экскурсавода падчас экскурсіі. Разам з ёй у судзе Фрунзенскага раёна сёння судзілі і ўдзельнікаў тургрупы.

31 студзеня ў Мінску затрымалі экскурсавода Аксану Манкевіч, нагадвае TUT.BY. Яна атэставаны гід, працуе як ІП, на яе сайце сярод экскурсій па Беларусі ёсць і кірунак па гістарычнаму цэнтру Мінска: ад плошчы Свабоды да праспекта Незалежнасці каля плошчы Незалежнасці. Прыкладна там групу турыстаў і экскурсавода і затрымалі — каля гасцініцы «Мінск».

Сёння ў судзе Фрунзенскага раёна суддзя Наталля Бугук асудзіла па скайпе Аксану Манкевіч на 15 сутак па артыкуле 23.34 КаАП. 

У судзе Манкевіч распавяла, што праводзіла экскурсію: спачатку ў ёй бралі ўдзел 11 чалавек, на момант затрымання іх было 7. Гід хадайнічала, каб ля гасцініцы «Мінск» і Ратушы запыталі запісы з камер відэаназірання. Суддзя адмовіла.

Суддзя зачытала пратакол, з якім экскурсавод не згодная. Нібыта Манкевіч прымала ўдзел у мерапрыемстве, на якое Мінгарвыканкам дазволу не выдаваў. Да пратаколу прыклалі скрыншот з телеграм-канала — суддзя не назвала якога. У паведамленні былі заклікі прыйсці на рэпетыцыю маршу перад УНС у цэнтры горада з 14 да 15 гадзін па маршруце ад гасцініцы «Мінск» да стэлы без пэўнай кропкі збору. Манкевіч і групу затрымалі а 15.15.

Экскурсавод сябе вінаватай не прызнала.

Удзельніца экскурсіі: «Перад гэтым амапаўцы выйшлі і пераканаліся, што нам распавядаюць праграму»

Мінчанка Яўгенія расказвае: у нядзелю днём трапіла на бясплатную экскурсію Манкевіч, даведаўшыся пра яе з інстаграма.

Кажа, што ішлі па маршруце ад плошчы Свабоды, экскурсавод распавядала пра гісторыю старога Мінска і развіццё горада. На экскурсіі замежнікаў не было.

— Выйшлі на праспект: там у нас быў пункт экскурсіі — паспрабаваць пірожнае «Мара» ва ўніверсаме «Цэнтральны». Далей мы пайшлі ў бок Чырвонага Касцёла, але не дайшлі, бо нас затрымалі. Хоць у нас нічога такога не было — ніякіх чырвоных шапак, мы нічым не размахвалі, нічога не выкрыквалі. У гіда быў бэйдж. Да гэтага спыняўся мікрааўтобус з АМАПам, яны выйшлі і паслухалі, што адбываецца ў двух метрах ад гіда. Пераканаліся, што нам распавядаюць праграму, — і пакінулі нас у спакоі, — кажа Яўгенія.

Дзяўчына не лічыла, колькі было людзей. Кажа, што да 12. Некалькі чалавек далучыліся ў шляху, потым сышлі. Каля гасцініцы «Мінск» спыніўся яшчэ адзін аўтобус з сілавікамі. Са слоў Яўгеніі, пры затрыманні экскурсавод паказала бэйдж і патлумачыла супрацоўнікам, што ён проста так не выдаецца, а тут — экскурсія, але ўсіх пасадзілі і павезлі ў Фрунзенскае РУУС.

— У аўтобусе былі і іншыя затрыманыя: дзяўчынка, якая міма ішла, іншагароднія бацька з сынам, якія спачатку сядзелі ў «МакДональдсе», а потым збіраліся рухацца на вакзал на электрычку, і іх у гэты час затрымалі.

Ноч Яўгенія правяла ў ІЧУ на Акрэсціна, у яе двое маленькіх дзяцей, з імі ўвесь гэты час быў муж.

— На Акрэсціна мы спалі на жалезных прутах, без матрацаў. Хтосьці спаў на лаве, хтосьці — на стале, хтосьці не мог спаць. Нас было 15 у чатырохмясцовай камеры.

1 лютага над Яўгеніяй прайшоў суд, ёй прызначылі штраф у 30 базавых велічынь (870 рублёў). Затрыманай паставілі несанкцыянаваны мітынг, абвінавацілі па артыкуле 23.34 КаАП. Па словах суразмоўніцы, яе палічылі вінаватай.

— У РУУС гід паказала ўсе дакументы, патлумачыла, што не трэба рэгістраваць мерапрыемствы такога кшталту, а бясплатныя экскурсіі праводзяцца для рэкламы. Да нашых спраў быў прыкладзены скрыншот з мэсэнджара, дзе было паведамленне аб тым, што будзе праводзіцца мітынг, людзі павінны быць у масках і без сімволікі. У мяне тэлефон просты, у ім нават камеры няма — я заявіла на судзе, што ў мяне не магло быць такога паведамлення. Міліцыя нібыта зрабіла запыт, што гэта было несанкцыянаванае мерапрыемства, — кажа Яўгенія.

Як паведамляе тэлеграм-канал «Вясна назірае», яшчэ адну ўдзельніцу экскурсіі, у якой ёсць дзіця, аштрафавалі на 30 базавых. Іншую ўдзельніцу за экскурсію асудзілі на 15 сутак.

Паводле news.tut.by