У Гродне знайшлі павешаным былога АМАПаўца. Родныя не надта вераць у суіцыд

Трагедыя адбылася 25 студзеня ў Гродне. Як стала вядома s13.ru з вартых даверу крыніц, цела маладога чалавека было знойдзена павешаным на здымнай кватэры ў адным з гродненскіх шматпавярховікаў. 21-гадовы Максім М. у верасні гэтага года звольніўся з АМАП і ў момант трагедыі быў беспрацоўным.

Жонка загінулага распавяла, што да канца не можа паверыць у версію суіцыду. У дзень трагедыі яна размаўляла з мужам за две гадзіны да смерці — ні ў размове, ні ў голасе нічога дзіўнага яна не заўважыла.

— Ён быў дома, збіраўся паехаць у гэты дзень да бацькоў у іншы горад, папрасіў забраніраваць яму білет, што я і зрабіла. Перад гэтым ён збіраўся з братам у аквапарк. Але ўвечары перастаў адказваць на ўсе званкі —мае, брата, сяброў. Я прыехала дадому — і ўбачыла ўсё... Мяне збянтэжылі і ключы, якія былі кінутыя на падлозе, і разбітая свяцільня... Пры гэтым у Максіма не было ніякіх драпін або парэзаў…

Удава распавядае, што з міліцыі Максім звольніўся яшчэ ў верасні па стане здароўя. Да гэтага ён знаходзіўся на бальнічным, і ў жніўні не прымаў удзелу ў падзеях, якія развіваліся на вуліцах горада.

— Ён наогул стараўся заўсёды прытрымлівацца нейтральнай пазіцыі, не прымаў нічый бок. Але казаў, што пайсці супраць людзей ён не зможа.

У гродненскай міліцыі пацвердзілі, што загінулы працаваў у атрадзе міліцыі асаблівага прызначэння да верасня.

— Супрацоўнік міліцыі меў апалітычныя погляды і яго звальненне ніяк не звязана з падзеямі ў краіне. Ён даўно збіраўся звальняцца, — распавялі ў прэс-службе УУС Гродненскага аблвыканкама.

У загінулага засталася падгадаваная дачка.