Навігатар беларускай незалежнасці: блогер стварыў карту месцаў, звязаных з БНР
Як беспамылкова трапіць у месцы звязаныя з абвяшчэннем БНР, або на магілу Рамана Скірмунта на Палессі або Міколы Абрамчыка ў Парыжы? Дзе помнік слуцкім паўстанцам у Германіі ці будынак у Мінску, дзе абвясьцілі незалежнасьць БНР? У гэтым дапаможа гістарычная карта на базе GoogleMaps, якую стварыў мінскі блогер.
Альшанскія могілкі ў Празе. Айцец Андрусь Абламейка.
На карце Максіма Ляшко да 100-годдзя абвяшчэння незалежнасці Беларускай Народнай Рэспублікі больш за 60 кропак, адзначае Дзмітрый Гурневіч на сайце Радыё «Свабода».
Гуглаўская карта працуе і ў якасці дадатку на смартфонах. Задаўшы ёй зыходны пункт можна беспраблемна патрапіць у абранае месца. Сам стваральнік карты кажа, што нанёс амаль усе памятныя мясціны, звязаныя з БНР і яе дзеячамі.
«Каб кожны мог самастойна паўдзельнічаць у святкаванні юбілею, асабліва калі ён не ў Мінску. Гэтых кропак, вядома, значна больш, але я дадаў самыя важныя», — кажа Ляшко.
Аўтар карты прапануе дасылаць яму адрэсы важных аб'ектаў, якія варта на яе ўнесці. Адпраўляць паведамленні ён прапануе праз Твітэр або Фэйсбук.
Паводле nn.by