Наляпіла ўлётку — парушыла парадак пікетавання?

Адміністрацыйную справу за наклееную Наталляй Спірыдонаваў улётку віцебскія міліцыянты перакваліфікавалі па артыкуле 23.34 — парушэнне парадку правядзенне масавага мерапрыемства.

7 лютага Наталля Спірыдонава паведаміла "Вясне" пра тое, што чакае суда 11 лютага ў 9.00 (суд Першамайскага раёна г. Віцебска). Там будзе разглядацца справа аб неўступленні ў законную сілу рашэння адміністрацыі Першамайскага раёна, якая папярэдне вынесла рашэнне аб штрафе за ўлётку ў 270 рублёў.

"Сёння мне патэлефанавала сакратарка суда і сказала, што пракурор Віцебскай Пракуратуры падаў пратэст на рашэнне адміністрацыі, вось гэтая справа і будзе разглядацца 11 лютага", — распавяла Наталля Спірыдонава, паведаміла Наталля Спірыдонава "Вясне".

Раней, 27 студзеня, актывістаў “Еўрапейскай Беларусі” Наталлю Спірыдонаву і Алеся Круткіна затрымалі і даставілі ў РАУС Кастрычніцкага раёна Віцебска, дзе абвінавацілі ў расклейцы ўлётак “Калгаснай дыктатуры – баста!”. На актывістаў склалі пратаколы паводле артыкула 17.1 КаАП (дробнае хуліганства), каб на наступны дзень іх судзіць.

Тады Алесь Круткін быў адпраўлены ў ІЧУ, а Наталлю Спірыдонаву вызвалілі пад падпіску. Але тут жа актывістку павезлі ў іншы, Першамайскі РАУС, дзе на яе быў складзены другі пратакол па артыкуле 21.14 КаАП (Парушэнне правілаў добраўпарадкавання і ўтрымання населеных пунктаў).

Наталля растлумачыла “Вясне”, што прычына гэтага пратакола — улётка, налепленая на будынак ГП “Віцебскі ДСК”. Міліцыянты тады ёй сказалі, што справу разгледзіць адміністрацыйная камісія без яе і дашле ёй сваё рашэнне (бо справы па арт 21.14 КаАП суд не разглядае).

На наступны дзень, 28 студзеня, у судзе Кастрычніцкага раёна Віцебска, як і планавалася, прайшло судовае пасяджэнне над актывістамі — за ўлётку, якая была налепленая на будынку Пракуратуры Віцебска.

На судзе Наталля Спірыдонава вырашыла хадайнічаць аб перакваліфікацыі адміністрацыйнага правапарушэння з арт. 17.1 КаАП на ч. 2 арт. 21.14 КаАП. Таму разгляд справы быў прыпынены, а пратаколы вернутыя ў Кастрычніцкі РАУС на выпраўленне недахопаў. 

Што ў выніку?

Пасля суда Наталлі Спірыдонавай была ўручана позва з’явіцца 31 студзеня ў Кастрычніцкі РАУС, дзе нарэшце перагледзелі пратакол за ўлётку на будынку Пракуратуры. Там актывістка даведалася, што адміністрацыйную справу перакваліфікавалі не па артыкуле 21.14, як яна хадайнічала, а па артыкуле 23.34 (парушэнне парадку правядзенне масавага мерапрыемства). З гэтай нагоды міліцыянты ўручылі ёй позву ў суд Кастрычніцкага раёна г. Віцебска: 12 лютага ў 15.30.

Таксама Наталля паведаміла, што ў гэты ж час суд будзе і ў Алеся Круткіна, які знаходзіцца цяпер у Віцебскім ІЧУ.

Паралельна міліцыянты паспрабавалі распытаць Наталлю пра іншыя ўлёткі, расклееныя па горадзе. Але актывістка ад дачы паказанняў адмовілася.

“Калі даведаемся, хто наклеіў, то мы павінны па кожнай улётцы скласці пратакол як за пікетаванне [то бок па арт. 23.34 — заўв. рэд.]", — паведамілі Наталлі міліцыянты.

А што ж па іншай улётцы?

Не дачакаўшыся рашэння адміністрацыйнай камісіі за ўлётку на будынку ГП “Віцебскі ДСК”, Наталля вырашыла патэлефанаваць у РАУС. Некалькі дзён ёй не давалі зразумелага адказу, але ўрэшце паведамілі: за гэтую ўлётку спачатку было прынята рашэнне аб накладанні штрафу ў 270 рублёў па ч. 2 артыкула 21.14, але потым рашэнне раптоўна адмянілі, а справу перанакіравалі на дапрацоўку ў пракуратуру.

Ці “ператрансфармуюць” і гэтую справу з “парушэння добраўпарадкавання” таксама ў “парушэнне масавага мерапрыемства”, пакуль невядома.

 Паводле spring96.org