18 тысяч подпісаў за адмену смяротнага пакарання ў Беларусі (фота)
Сёння, 6 ліпеня, беларускія праваабаронцы і прадстаўніца Amnesty International па Беларусі Айша Юнг павінны перадаць у Адміністрацыю прэзідэнта 18 тысяч подпісаў за адмену смяротнага пакарання ў Беларусі.
Айша Юнг
Подпісы сабраныя ў Нідэрландах, Бельгіі і іншых краінах свету.
У перадачы петыцый удзельнічаюць Айша Юнг, каардынатар Amnesty International па Беларусі, праваабаронцы Алесь Бяляцкі, Валянцін Стэфановіч, Андрэй Палуда, Сяргей Сыс.
Спецыялісты праваабарончага цэнтра "Вясна" дапамаглі аформіць сабраныя подпісы як звароты грамадзян — дзеля таго, каб яны былі разгледжаны ў адпаведнасці з беларускім заканадаўствам.
У звароце нагадваецца, што Беларусь — апошняя краіна ў Еўропе, дзе ўжываецца смяротнае пакаранне. Ад пачатку 1990 года да вышэйшай меры ў Беларусі было прыгаворана больш за 400 чалавек, за ўвесь гэты час смяротнае пакаранне было заменена турэмным тэрмінам толькі аднаму асуджанаму. Ад пачатку 2017 года адзін прысуд быў прыведзены ў выкананне. Гамяльчанін Сяргей Вострыкаў, скаргу якога Вярхоўны суд пакінуў без задавальнення, растраляны ў другой палове красавіка. Яшчэ адзін чалавек чакае выканання прысуду — гэта жыхар Мазыра Кірыл Казачок, які адмовіўся ад падачы апеляцыйнай скаргі.
Еўрапейскія грамадзяне заклікаюць беларускія ўлады ў якасці першага крока ўвесці мараторый на смяротнае пакаранне.
"Няўхільны ціск на ўладу ў гэтым пытанні дасць вынік, — адзначыў Алесь Бяляцкі. — Гэта і наша пазіцыя, і пазіцыя замежнікаў".
Пакуль праваабаронцы рэгістравалі зварот, каля будынка адміністрацыі праходзіў шведскі дэпутат Парламецскай асамблеі АБСЕ Хрысціан Хольм Барэндфельд, які таксама выказаўся за адмену смяротнага пакарання.
На працягу 30 дзён улады павінны адказаць на петыцыю.