Літва першай з краін ЕС цалкам адмовілася ад расійскага газу

Літва з пачатку красавіка цалкам спыніла імпарт газу з Расіі, стаўшы першай краінай ЕС, якая пайшла на такі крок. Як паведамляе LRT, пра гэта заявіла літоўскае Міністэрства энергетыкі.

У ведамстве паведамілі, што з пачатку красавіка літоўская газатранспартная сістэма не імпартавала газ з РФ. Гэта пацвярджаюць і даныя аператара Amber Grid: згодна з імі, на 2 красавіка імпарт расійскага газу ў Літву праз інтэрканектара з Беларуссю быў нулявым.

Зараз усе газавыя патрэбы Літвы задавальняюцца дзякуючы імпарту праз СПГ-тэрмінал у Клайпедзе. Па разліках, у далейшым гэтага павінна быць дастаткова.

Пры неабходнасці газ могуць перапампоўваць таксама з Латвіі, а з 1 мая — праз інтэрканектар з Польшчай.

Міністр энергетыкі Дайніус Крэйвіс назваў гэта паваротным пунктам у энерганезалежнасці Літвы.

«Мы першая краіна ЕС, якая атрымлівала газ ад «Газпрама» і якая стала незалежнай ад паставак газу з Расіі», — заявіў ён.

«Пачынаючы з гэтага месяца, у Літве больш не будзе расійскага газу. Шмат гадоў таму мая краіна прыняла рашэнні, якія цяпер дазваляюць нам без болю разарваць энергетычныя сувязі з агрэсарам. Калі мы змаглі — астатняя Еўропа таксама зможа», — пракаментаваў рашэнне прэзідэнт Літвы Гітанас Наўседа.

Літва — сярод краін, якія найбольш актыўна прасоўваюць у Еўрасаюзе нафтавае і газавае эмбарга супраць Расіі, нагадвае «Украінская праўда».

Таксама Літва не так даўно па ўласнай ініцыятыве закрыла шлях беларускім калійным угнаенням праз порт у Клайпедзе.