Латушка звярнуўся да інвестфондаў, якія перад выбарамі купілі беларускія еўрабонды: грошы пайшлі на рэпрэсіі

Кіраўнік Народнага антыкрызіснага кіравання Павел Латушка звярнуўся да інвестфондаў, якія перад выбарамі купілі беларускія еўрабонды на 1,2 млрд. долраў. Гэтыя грошы пайшлі на рэпрэсіі.

Улетку 2020 года 27 інвестыцыйных фондаў з Вялікабрытаніі, Францыі, Швейцарыі, ЗША і іншых краін купілі беларускія еўрабонды. Размяшчэннем бондаў займаліся тры інвестбанкі: Societe Generale, Citibank і Raiffeisen.
Сярод гэтых інвестфондаў шмат вядомых кампаній: Raiffeisen Bank International AG, Deutsche Bank, Goldman Sachs, Morgan Stanley і іншыя.
Народнае антыкрызіснае кіраванне накіравала лісты ўсім інвестфондам, якія трымаюць беларускія бонды, тром інвестбанкам, якія размяшчалі аблігацыі, і Міжнароднаму валютнаму фонду (МВФ).
Грошы з продажу еўрабондаў пайшлі не на рэфінансаванне знешняга доўгу, як гэта было заяўлена ў праспекце эмісіі, а на рэпрэсіі супраць беларускага народа, гаворыцца ў заяве НАК. Да таго ж, на момант эмісіі бондаў ў Беларусі ўжо парушалі законы і правы чалавека: саджалі патэнцыйных кандыдатаў у прэзідэнты ў турмы, разганялі мірныя дэманстрацыі, не дапускалі незалежных людзей у склад участковых выбарчых камісій.
«Мы хочам, каб інвестыцыйныя фонды прад'явілі належныя ім еўрабонды да датэрміновага пагашэння і вярнулі сабе грошы.
Мы хочам, каб інвестыцыйныя банкі праверылі выкарыстанне грошай, атрыманых ад продажу еўрабондаў. Таксама мы заклікаем інвестбанкі адмовіцца ад любых адносін з нелегітымным урадам і дзяржарганізацыямі, якія звязаны з парушэннем правоў чалавека.
Мы хочам, каб МВФ зрабіў заяву аб тым, што арганізацыя не будзе крэдытаваць Беларусь, паколькі ні Лукашэнка, ні яго ўрад не прызнаныя міжнароднай супольнасцю. Таксама мы хочам прыцягнуць увагу сусветнай грамадскасці і СМІ да праблемы.
Рэжым Лукашэнкі жыве ў пастаянных даўгах, бярэ велізарныя новыя крэдыты, каб пагасіць старыя. Каб нелегітымны ўрад не ўганяў народ Беларусі ва ўсё новыя пазыкі, якія будуць аддаваць беларусы, мы хочам зрабіць так, каб ніхто больш не даваў крэдытаў рэжыму.
Як гэта можа адбіцца на жыцці звычайнага беларуса?
Усё залежыць ад рэакцыі міжнародных фінансавых інстытутаў. У любым выпадку, эканоміка Беларусі набліжаецца да прорвы з кожным днём — з-за карупцыі Лукашэнкі і набліжаных, неэфектыўнага кіравання і пастаянных памылак.
Каб абараніць свае грошы, лепш захоўваць іх у замежнай валюце і наяўнымі: забярыце грошы з банка, перавядзіце рублі ў долары ці еўра.
Мы працуем па гэтым кірунку ў рамках эканамічнага ціску па Плане Перамогі Народнага антыкрызіснага кіравання».