Забіты ў Кіеве палкоўнік збіраў на Данбасе доказы атакі Расіі на Украіну

Максім Шапавал кіраваў падраздзяленнем глыбіннай выведкі, якое паведамляла аб разгортванні расійскай артылерыі. Праваахоўнікі расследуюць выбух аўто палкоўніка ваеннай разведкі як тэрарыстычную атаку.

Узарваны ў аўто ў Кіеве супрацоўнік ГУ разведкі Мінабароны, палкоўнік Максім Шапавал забяспечваў доказы ўзброенай агрэсіі Расіі супраць Украіны. Пра гэта са спасылкай на крыніцу ў праваахоўных органах піша LB.ua.

"Унікальнасць разведвальных аперацый заключалася ў тым, што ўжываліся сродкі дакументавання расейскіх акупацыйных войскаў, іх перасоўванняў, наяўнасці сучасных узораў сістэм РЭБ і сродкаў паражэння", — заявіў суразмоўца выдання.

Па словах крыніцы, задакументаваныя факты маглі служыць безумоўным доказам узброенай агрэсіі Расіі супраць Украіны, асабліва ва ўжыванні штатных БТРГ і найноўшых сістэм паражэння, якія вырабляюцца толькі ў Расіі.

"Гэта дзякуючы яму Украіна абгрунтавала сваю пазіцыю ў Гаазе аб датычнасці Расіі да ўзброенай агрэсіі, а перад гэтым прадаставіла ўсе такія задакументаваныя факты па дыпламатычных каналах і па каналах абмену інфармацыяй з разведвальнымі органамі саюзнікаў", — дадалі ў праваахоўных органах.

Акрамя гэтага, суразмоўца выдання адзначыў, што Шапавал непасрэдна ўдзельнічаў не толькі ў планаванні, але і ў правядзенні разведвальных рэйдаў у глыбокі тыл акупаваных тэрыторый, шэраг такіх аперацый тычыліся своечасовага апавяшчэння аб разгортванні расійскай артылерыі, у тым ліку дальнабойнай, што значна зніжала страты сярод украінскіх ваенных і мірнага насельніцтва.

"Максіма знішчылі ворагі дэманстратыўна, у тым ліку як элемент запалохвання і як элемент інфармацыйнай аперацыі па дыскрэдытацыі самых адданых сыноў Украіны", — рэзюмавалі праваахоўнікі.

Паводле tsn.ua